पर्सामा निर्वाचन पर्यवेक्षकहरुका लागि अभिमुखीकरण

मंसिर ४ गते हुने प्रतिनिधि सभा तथा प्रदेश सभा सदस्य निर्वाचन २०७९ का लागि पर्सामा खटिने पर्यवेक्षकका लागि अभिमुखीकरण कार्यक्रम सम्पन्न भएको छ । राष्ट्रिय निर्वाचन पर्यवेक्षण समिति ( नियोक)को आयोजनामा वीरगञ्जको होटल कुमु प्यालेसमा अभिमुखीकरण सम्पन्न भएको हो ।
कार्यक्रममा बोल्दै नियोकका पर्सा संयोजक अधिवक्ता कमलमोहन पोखरेलले निर्वाचन लोकतन्त्रको मेरुदण्ड भएको बताउनुभयो । उहाँले मतदान मार्फत पाँच वर्षका लागि आफूलाई शासन गर्ने व्यक्ति चुन्ने काम निर्वाचनबाट हुने जानकारी दिनुभयो । निर्वाचनलाई निष्पक्ष बनाउन पर्यवेक्षकको भूमिका रहने उहाँको भनाई छ । पर्यवेक्षकको मुख नहुने बताउँदै उहाँले आँखा र कान भने तेज हुने बताउनुभयो ।
‘स्वतन्त्र र निष्पक्ष निर्वाचनको अधिकार, लोकतन्त्र र मानव अधिकारको आधार’ भन्ने मुल मन्त्र लिएको नियोकले मंसिर ४ गते हुने निर्वाचनको अनुगमनका लागि देशभर पर्यवेक्षक खटाउँदैछ ।