पर्सा । पर्सा निर्वाचन क्षेत्र नम्बर–२ अन्तर्गत पर्सागढी नगरपालिका वडा नम्बर–८ हरपुरमा नेपाली कांग्रेसका प्रतिनिधिसभा सदस्य पदका उम्मेदवार अजयकुमार चौरसियाले कार्यकर्ता भेटघाट तथा घरदैलो कार्यक्रमलाई निरन्तरता दिएका छन्। चुनावी अभियानको क्रममा सम्पन्न उक्त कार्यक्रममा स्थानीयवासीसँग प्रत्यक्ष संवाद र जनसम्पर्क गरिएको थियो।
घरदैलोका क्रममा उम्मेदवार चौरसियाले नेपाली कांग्रेसको नेतृत्वमा मात्रै जनताको हितमा दिगो काम हुने विश्वास व्यक्त गरे। उनले विकास, रोजगारी, शिक्षा र कृषिलाई प्राथमिकतामा राख्दै जनताको आवश्यकता र चाहनाअनुसार काम गर्ने प्रतिबद्धता जनाए।
साथै लोकतन्त्र र समावेशी विकासको पक्षमा उभिएको नेपाली कांग्रेसलाई यसपटकको निर्वाचनमा विजयी बनाउन स्थानीय मतदातासँग आग्रहसमेत गरेका थीए।
उक्त कार्यक्रममा मधेश प्रदेशका भूमि व्यवस्था, कृषि तथा सहकारी मन्त्री श्याम पटेलको विशेष उपस्थिति रहेको थियो। कार्यक्रममा बोल्दै मन्त्री पटेलले कांग्रेसको नीतिले नै मधेशसहित देशको समग्र विकास सम्भव हुने उल्लेख गर्दै कांग्रेस उम्मेदवारलाई समर्थन गर्न आग्रह गरेका थिए।
कार्यक्रममा नेपाली कांग्रेसका केन्द्रीय सदस्य रामरूप कुर्मी, पार्टीका सक्रिय नेता तथा कार्यकर्ताहरू नितेन्द्र साह, विश्वमोहन दास थारु, जयराम दास थारु, विनोद ठाकुर, नन्दु चौधरी, शैलेन्द्र चौधरी र शिवनारायण राम लगायतको उल्लेखनीय सहभागिता रहेको थियो।
