वीरगञ्ज — वीरगञ्ज महानगरपालिका–१८ सौराहामा विदेशमा रहेका युवाहरूको आर्थिक सहयोगमा बौधीमाई, ब्रह्मबाबा र सातोमाई मन्दिरमा घण्टा जडान गरिएको छ।
लामो समयदेखि वैदेशिक रोजगारीमा रहेका स्थानीय युवाहरूले आफ्नो गाउँका धार्मिक स्थलमा आवश्यक घण्टा जडान गर्न ४२ हजार रुपैयाँ सहयोग गरेका हुन्। २१ जना युवाको समूहले आपसी सहकार्यमा रकम संकलन गरी मन्दिरहरूमा घण्टा जडानका लागि सहयोग गरेको स्थानीयले जनाएका छन्।
स्थानीय राजेन्द्र साहले सामाजिक सञ्जालमार्फत सहयोग गर्ने युवाहरूलाई धन्यवाद दिँदै गाउँको धार्मिक तथा सांस्कृतिक सम्पदाको संरक्षणमा उनीहरूले देखाएको सक्रियताको प्रशंसा गरेका छन्।
विदेशमा रहेर पनि आफ्नो गाउँ र समाजप्रतिको जिम्मेवारी निर्वाह गर्दै युवाहरूले गरेको सहयोगले स्थानीय धार्मिक स्थलको विकासमा योगदान पुगेको छ। आपसी सहकार्य र सामूहिक प्रयासबाट गाउँका आवश्यकतामा सहयोग गर्न सकिने उदाहरणका रूपमा यस कार्यलाई स्थानीयले लिएका छन्।
वैदेशिक रोजगारीमा रहेका युवाहरूले आफ्नो कमाइको केही हिस्सा गाउँको धार्मिक तथा सामाजिक कार्यमा खर्चिनुले जन्मभूमिप्रतिको उनीहरूको लगाव र सामुदायिक एकताको भावनालाई समेत उजागर गरेको छ।
