पोखरा । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ ले फागुन २१ गते हुने प्रतिनिधिसभा निर्वाचनपछि आफ्नो पार्टी नै पहिलो दल बन्ने दाबी गरेका छन् । बुधबार पोखरामा आयोजित कार्यकर्ता भेटघाट कार्यक्रममा बोल्दै संयोजक प्रचण्डले अहिले चार दलबीच कडा प्रतिस्पर्धा भइरहेको स्वीकार गर्दै नेपाली कांग्रेस, नेकपा (एमाले) र राष्ट्रिय स्वतन्त्र पार्टी (रास्वपा) लाई प्रमुख प्रतिस्पर्धीका रूपमा उल्लेख गरे । “अबको १५ दिनमा नेकपाले टप्यो भन्ने दिन आउँदैछ,” उनले भने ।
संयोजक प्रचण्डले पार्टीको घोषणापत्रलाई केहीले महत्वाकाङ्क्षी भने पनि त्यो समाजवादतर्फको यात्राको स्पष्ट रोडम्याप भएको जिकिर गरे । “हामी हिजोका ठाउँमा छैनौँ, नयाँ ठाउँमा आइसकेका छौँ,” उनले भने, “समाजको तल्लो वर्गका आवाज उठाउँदै समाजवादी यात्राको दिशामा अगाडि बढीसकेका छौँ ।”
संविधान संशोधन एजेन्डा आफ्नै : प्रचण्ड
संविधान निर्माणका क्रममा तत्कालीन माओवादीले फरक मत दर्ता गराएको स्मरण गराउँदै प्रचण्डले संविधान संशोधनको मुद्दा आफ्नै भएको र त्यसलाई अगाडि बढाउने नैतिक आधार पनि नेकपासँगै रहेको दाबी गरे । “संविधान बनाउँदा नै रिजर्भेसन राखेर फरक मत दिएका कारण संशोधनको आवाज उठाउने नैतिक बल हामीसँग छ,” उनले भने ।
‘सूर्यभन्दा माथि तारा’
देशभर नेकपाको माहौल बनेको दाबी गर्दै प्रचण्डले नयाँ चुनाव चिह्नमा मत हाल्न कार्यकर्तालाई सक्रिय रूपमा सिकाउन निर्देशन दिए ।
“हामीले सूर्यभन्दा कति हो कति माथि हुन्छ तारा, त्यो लिइसक्यौँ,” उनले भने, “२६ वटा चुनाव चिह्नमा भोट हालेकालाई अब तारामा भोट हाल्न सिकाउनु छ ।”
ठूला सभा होइन, टोल–टोल र डिजिटल प्रचार
यसपटक पार्टीले महँगो ठूला सभा–सम्मेलन नगरी टोल–टोल र घर–घर अभियान तथा डिजिटल प्रचारलाई प्राथमिकता दिने रणनीति तय गरिएको पनि उनले बताए ।
“आजकल लाखौँ खर्च गरेर सभा गरेर भोट पाउने जमाना गयो,” प्रचण्डले भने, “मिसइन्फर्मेसनलाई काउन्टर गर्ने र आफ्ना राम्रा कुरा पोस्ट र शेयर गर्न नछाड्नुहोला ।” उनका अनुसार पार्टीले डिजिटल प्रचारका लागि पेरिसडाँडामा विशेष टिम नै गठन गरेको छ र अघिल्लो निर्वाचनमा सभा–सम्मेलनमा गरिने खर्च अहिले सूचना प्रविधिमा केन्द्रित गरिएको छ ।
‘सबैभन्दा नयाँ पार्टी हामी नै’
नेकपा नयाँ दृष्टिकोण, नयाँ सोच र निर्वाचन आयोगको रेकर्डअनुसार पनि नयाँ पार्टी भएको दाबी गर्दै प्रचण्डले संघीय गणतन्त्रको प्रवर्तक भएकाले नेकपाकै भिजन सबैभन्दा नयाँ भएको बताए ।
“गएको कात्तिक १९ गते बनेको यही नयाँ कम्युनिस्ट पार्टी हो,” उनले भने, “त्यसपछि निर्वाचन आयोगमा कुनै नयाँ पार्टी दर्ता भएका छैनन् ।”
