वीरगञ्ज । राष्ट्रिय स्वतन्त्र पार्टी (रास्वपा) पर्सा निर्वाचन क्षेत्र नम्बर १ का उम्मेदवार हरिपन्तले चुनावी प्रचार अभियानलाई तीव्र बनाउँदै विभिन्न वडामा घरदैलो कार्यक्रम सञ्चालन गरिरहेका छन्।
सोही क्रममा उनले आज क्षेत्रअन्तर्गत सुखचैनामा स्थानीय मतदातासँग भेटघाट तथा जनसम्पर्क कार्यक्रम सम्पन्न गरेका छन्।
घरदैलो कार्यक्रमका क्रममा स्थानीयवासीको उल्लेखनीय सहभागिता देखिएको थियो।
मतदाताहरूले उम्मेदवार हरिपन्तप्रति उत्साहजनक समर्थन जनाउँदै आफ्ना समस्या, अपेक्षा र सुझावहरू राखेका थिए। हरिपन्तले जनतासँग प्रत्यक्ष संवाद गर्दै रास्वपाको एजेन्डा, सुशासन, विकास र अवसर सिर्जनाका विषयमा आफ्नो धारणा प्रस्तुत गरेका थिए।
यसैबीच, काठमाडौं महानगरपालिकाका पूर्व मेयर बालेन शाहको वीरगञ्ज आगमनको समय नजिकिँदै गएको चर्चा स्थानीय स्तरमा फैलिँदै गएसँगै राजनीतिक माहोल थप चासोपूर्ण बनेको छ। बालेन शाह वीरगञ्जतर्फ आउने तयारीमा रहेको जानकारीले रास्वपा समर्थक तथा युवाहरूमा विशेष उत्साह देखिएको छ।
उम्मेदवार हरिपन्तले आगामी दिनहरूमा पनि क्षेत्र नम्बर १ का अन्य वडाहरूमा घरदैलो तथा जनसम्पर्क कार्यक्रमलाई निरन्तरता दिने जानकारी दिएका छन्। उनले जनताको विश्वास र समर्थनलाई नै आफ्नो अभियानको मुख्य आधार बनाउँदै चुनावी गतिविधि थप प्रभावकारी बनाउने बताए ।
