वीरगञ्ज — पर्सा निर्वाचन क्षेत्र नम्बर–१ का नेकपा एमाले उम्मेदवार प्रदीप यादवले जनताको हरेक सुख–दुःखमा साथ दिँदै आएका नेतालाई मात्र मतदान गर्न आग्रह गरेका छन्।
मंगलबार वीरगञ्जमा आयोजित नेकपा एमाले पर्सा जिल्ला स्तरीय बृहत् कार्यकर्ता भेलालाई सम्बोधन गर्दै पूर्वमन्त्रीसमेत रहेका यादवले चुनावका बेला मात्र देखिने र अन्य समयमा जनताबाट टाढा रहने नेताप्रति सजग हुन मतदातालाई आग्रह गरे।
‘चुनाव आउँदा मात्रै देखा पर्ने र अरू बेला गायब हुने नेताहरू फेरि उम्मेदवार बनेर आएका छन्,’ उनले भने, ‘जनताको हरेक सुख–दुःख, आपत्–विपत्मा साथ दिँदै आएको उम्मेदवारलाई नै भोट दिएर जिताउनुपर्छ।’
यादवले यसपटकको निर्वाचनमा पर्साका चारवटै निर्वाचन क्षेत्रमा जनताको समस्या र पीडामा साथ दिने उम्मेदवार एमालेले अघि सारेको दाबी गरे। उनका अनुसार त्यसकै कारण चारवटै निर्वाचन क्षेत्रमा एमाले विजयी हुने विश्वास छ।
‘चारवटै क्षेत्रमा एमालेलाई अत्यधिक बहुमतका साथ जिताउने जिम्मेवारी हाम्रो काँधमा आएको छ,’ उनले भने, ‘यो चुनावमा एमाले नै जित्छ, संविधान पनि जोगाउँछ।’
वीरगञ्जसहित पर्साका विभिन्न पालिकामा खानेपानीको गम्भीर समस्या देखिँदा अहिले उम्मेदवार बनेर आएका कतिपय नेताहरू जनताको दैलोमा नदेखिएको यादवको आरोप छ। ‘त्यो बेला म खानेपानी मन्त्री थिएँ,’ उनले भने, ‘म आफैं जनताको घर–घरमा पुगेँ, पानी खुवाएँ। दुःख र विपत्को बेला साथ दिने नेता को हो भन्ने कुरा जनताले बिर्सनु हुँदैन।’
