पर्सा — पर्साको बहुदरमाई नगरपालिका वडा नम्बर २ मा नेपाली काँग्रेसको अगुवा कार्यकर्ता भेला सम्पन्न भएको छ। आइतबार बिहान पिपरास्थित बहुदरमाई मन्दिर प्रांगणमा आयोजित भेलामा सम्बोधन गर्दै पर्सा क्षेत्र नं। २ का नेपाली काँग्रेसका उम्मेदवार अजयकुमार चौरसियाले पर्सा–२ का ग्रामीण भेग आगामी १० वर्षभित्र वीरगन्ज शहरजस्तै विकसित हुने दाबी गर्नुभएको छ।
उहाँले बिन्दवासिनी क्षेत्रमा नेपाली काँग्रेसका नेताहरूको पहलमा जग्गा पोलिटेक्निकल इन्स्टिच्युट निर्माण प्रक्रिया सुरु भइसकेको जानकारी दिनुभयो। साथै खेलकुद रंगशाला निर्माणको प्रयास भइरहेको, सडक लगायतका भौतिक पूर्वाधारका काम अघि बढिरहेको उल्लेख गर्दै आगामी निर्वाचनपछि यी सबै योजनाले थप तीव्रता लिने बताउनुभयो।
कांग्रेस उम्मेदवार चौरसियाले राणाशासनको अन्त्य नेपाली काँग्रेसको नेतृत्वमा विपी कोइराला, गणेशमान सिंह, कृष्णप्रसाद भट्टराई, गिरिजाप्रसाद कोइरालालगायतका महान व्यक्तित्वहरूले गरेको स्मरण गराउँदै जिम्दारी शासन उन्मूलन, प्रजातन्त्र बहाली, मधेस विकासका लागि मेची–महाकाली सडक जोड्ने कार्य समेत काँग्रेसकै नेतृत्वमा सम्पन्न भएको बताउनुभयो।
उहाँले वर्तमान अवस्थामा पनि जनताको हकअधिकारका लागि काँग्रेस निरन्तर क्रियाशील रहेको उल्लेख गर्दै क्षेत्र नं। २ सहित देशभर नेपाली काँग्रेसलाई विजयी गराउन आग्रह गर्नुभयो।
बहुदरमाई नगरपालिका वडा नम्बर २ का काँग्रेस बुथ सभापति मोही रहमान हवारीको अध्यक्षतामा सम्पन्न उक्त भेलामा मधेस प्रदेशका कृषि मन्त्री श्याम पटेल, काँग्रेस केन्द्रीय सदस्य रामरुप कुर्मी, क्षेत्रीय सभापति महमद साहबुदिन, वडाध्यक्ष जितेन्द्र पटेललगायत नेता तथा कार्यकर्ताहरूको सहभागिता रहेको थियो।
