परवानीपुर ।
परवानीपुर गाउँपालिका–५, टोल नौतनमा अवस्थित ऐतिहासिक तथा धार्मिक महत्व बोकेको श्रीराम जानकी मन्दिर दयनिय अवस्थामा पुगेको छ। स्थानीयहरूको भनाइ अनुसार मन्दिर परिसरमा फोहोर व्यवस्थापन र खानेपानीको व्यवस्था एकदमै नाजुक रहेको छ, जसले भक्तजन र सर्वसाधारणलाई निकै असहज बनाएको छ।
गाउँपालिकाकी उपाध्यक्ष सुगान्धी देवी कानुईनकै टोलमा रहेको यस मन्दिरमा उनले पछिल्लो समय पार्वती मन्दिरको शिलान्यास गरेकी हुन्। तर स्थानीयको आरोप छ कि मुख्य मन्दिरको अवस्थाप्रति उनले कुनै गम्भीरता देखाएकी छैनन्।
स्थानीय बासिन्दाले बताए अनुसार विगत केही वर्षदेखि श्रीराम जानकी मन्दिरमा धार्मिक विवादका कारण दुई गुटमा विभाजित अवस्था रहेको छ। दुबै गुट छुट्टाछुट्टै धार्मिक कार्यक्रम गर्दै आए पनि सार्वजनिक हितका विषयमा चासो नदिइएको देखिन्छ।
एक स्थानीय बासिन्दाले नाम नखुलाउने सर्तमा बताए अनुसार, “मन्दिरका लागि आएको अनुदानबाट ल्याइएको पानी ट्यांकी अन्य योजनामा प्रयोग गरिएको छ। अहिले मन्दिरमा पानीको हाहाकार छ।”
यो समस्याले धार्मिक, सामाजिक तथा स्वास्थ्य क्षेत्रमा नकारात्मक असर पारिरहेको छ। तर स्थानीय बुद्धिजीवी तथा मन्दिर समितिका अध्यक्ष मौन छन्, जसप्रति आम जनताको चासो र आक्रोश बढ्दो छ।
स्थानीयहरू मन्दिरको संरक्षण, सरसफाइ, र मूलभूत सुविधा जस्तै पानीको तत्काल व्यवस्था गर्न माग गर्दै छन्। सम्बन्धित निकाय र जनप्रतिनिधिहरूको ध्यानाकर्षण गराउँदै, उनीहरूले यथाशीघ्र उचित कदम चाल्न आग्रह गरेका छन्।
