वीरगन्ज, ३ असार — लायन्स क्लब अफ संस्कृती गोल्ड वीरगन्जले सामाजिक उत्तरदायित्वअन्तर्गत वीरगन्ज कपडा बैंकलाई १० झोला कपडाहरू सहयोग गरेको छ। क्लब अध्यक्ष रितिका जैसवालको नेतृत्वमा कपडा हस्तान्तरण गरिएको हो।
कपडा बैंकका अध्यक्ष लालबाबु सिंहलाई कपडाहरू हस्तान्तरण गर्दै क्लबले आगामी दिनहरूमा पनि निरन्तर सहयोग गर्ने प्रतिबद्धता जनाएको छ।
यस अवसरमा क्लबकी सदस्य नितु गुप्ता, बैंकका सचिव कन्हैया पटेल, सदस्यद्वय निला राम र नवराज भट्टराई, तथा कर्मचारी शोभा देवी लगायतको उपस्थिति रहेको थियो।
अध्यक्ष रितिका जैसवालले भनिन्,
“वीरगन्ज कपडा बैंकले विगत केही वर्षदेखि विपन्न, असहाय, बाढी र आगलागी पीडितलाई घरमै पुगेर निःस्वार्थ सेवा दिँदै आएको कार्य सराहनीय छ। चाडपर्वमा नयाँ कपडा किन्न नसक्नेहरुलाई ‘नयाँ जस्तै’ कपडा उपलब्ध गराउन हामीले सहयोग गरेका हौं।”
कपडा बैंकका सल्लाहकार उपाध्यायले भने,
“‘तपाईंसँग धेरै छ भने हामीलाई दिनुहोस्, छैन भने हामीबाट निःशुल्क लिनुहोस्’ भन्ने मुलमन्त्रलाई आत्मसात गर्दै, वीरगन्ज–८ बाट दैनिक सेवा सञ्चालन भइरहेको छ।”
उहाँले थप जानकारी दिँदै भन्नुभयो कि बाढी, आगलागी, तथा अन्य आपत्कालीन अवस्थाहरूमा गाउँ–गाउँमा पुगेर कपडासँगै खाद्यान्न र अन्य राहत सामग्रीहरू पनि प्रदान गर्दै आएको छ।
कपडा सहयोगप्रति बैंकका तर्फबाट हार्दिक आभार प्रकट गरिएको छ।
यसैबीच, अध्यक्ष सिंहले धोबिनी गाउँपालिका–५ मा चट्याङका कारण आगलागी हुँदा सबै सम्पत्ति गुमाएका असेशर दासका लागि कपडा, खाद्यान्न, र घर निर्माण सहयोग गर्न सबै मानवतावादी सहयोगी हातहरूलाई आग्रह समेत गरेका छन्।
