पर्सा । पर्सा निर्वाचन क्षेत्र नं. २ अन्तर्गत बीरगञ्ज महानगरपालिका वडा नं. २७ उदयपुर घुर्मीस्थित कुहडी टोलमा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य उम्मेदवार सुशील कुमार कानु ले घरदैलो कार्यक्रमलाई निरन्तरता दिएका छन्।
घरदैलोका क्रममा उम्मेदवार कानुले जेष्ठ नागरिक, जेन्जी युवासहित स्थानीयवासीसँग प्रत्यक्ष संवाद गर्दै रास्वपा नेतृत्वमा मात्र यस क्षेत्रका पिछडिएका वर्ग, शिक्षक तथा आम नागरिकको पहुँच सुधार सम्भव हुने विश्वास व्यक्त गरे। उनले वैदेशिक रोजगारीमा गएका युवालाई स्वदेश फर्काएर स्थायी तथा दिगो रोजगारीको व्यवस्था गर्ने आफ्नो प्राथमिकता रहेको बताए।
कानुले विकास, रोजगारी, शिक्षा र कृषिलाई मुख्य एजेन्डाका रूपमा अघि सार्दै जनताको आवश्यकता र चाहनाअनुसार नीतिगत तथा व्यवहारिक रूपमा काम गर्ने प्रतिबद्धता जनाए। उनले समावेशी विकास, सुशासन र अवसर सिर्जनामा आधारित राजनीतिको पक्षमा रास्वपा दृढतापूर्वक उभिएको उल्लेख गरे।
घरदैलो कार्यक्रममा सहभागी स्थानीय मतदाताहरूले परिवर्तनमुखी एजेन्डा बोकेको राष्ट्रिय स्वतन्त्र पार्टीलाई यसपटक विजयी गराउन एकजुट भई समर्थन जनाएका थिए।
