पर्सा ।
पर्सा निर्वाचन क्षेत्र नम्बर–१ बाट राष्ट्रिय स्वतन्त्र पार्टी (रास्वपा) का प्रतिनिधिसभा सदस्य उम्मेदवार हरि पन्तलाई वीरगञ्ज महानगरपालिका अन्तर्गत मुर्ली क्षेत्रमा आज विशेष शैलीमा घरदैलो गराइएको छ।
घरदैलो तथा मतदाता भेटघाटका लागि मुर्ली पुगेका उम्मेदवार पन्तलाई स्थानीयवासीहरूले काँवर (काँबर) बोकाएर टोल–टोल घुमाउँदै घरदैलो गराएका हुन्। काँवरको अगाडि र पछाडि रास्वपाका सभापति रवि लामिछाने तथा वरिष्ठ नेता बालेन शाहको तस्बिर झुन्ड्याइएको थियो, जसले घरदैलो कार्यक्रमलाई थप आकर्षक बनाएको थियो।
घरदैलोका क्रममा स्थानीयवासीहरूले विभिन्न स्थानमा उम्मेदवार पन्तलाई टीका, माला र खादा लगाएर स्वागत गर्दै यसपटकको निर्वाचनमा आफ्ना वडाबाट रास्वपालाई अग्रता दिलाएर पठाउने प्रतिबद्धता व्यक्त गरेका थिए।
कार्यक्रममा रास्वपाका स्थानीय नेता तथा कार्यकर्तासँगै सर्वसाधारणको उत्साहजनक सहभागिता देखिएको थियो। स्थानीयको सक्रिय समर्थन र सहभागिताले मुर्ली क्षेत्रमा रास्वपाप्रति जनआकर्षण बढ्दै गएको संकेत गरेको छ।
