वीरगन्ज ।
जनता समाजवादी पार्टी, नेपाल (जसपा नेपाल) का तर्फबाट बारा निर्वाचन क्षेत्र नम्बर–४ का प्रतिनिधिसभा सदस्य उम्मेदवार सन्जु साहले चुनावी घरदैलो अभियान सुरु गरेका छन्।
निर्वाचन क्षेत्र नम्बर–४ अन्तर्गत पर्ने फेटा बजारबाट आज औपचारिक रूपमा घरदैलो कार्यक्रमको शुभारम्भ गरिएको हो। घरदैलोका क्रममा उम्मेदवार साहले स्थानीय मतदातासँग प्रत्यक्ष भेटघाट गर्दै विकास, रोजगारी र क्षेत्रको समग्र समृद्धिलाई केन्द्रमा राखेर आफ्ना चुनावी एजेण्डा प्रस्तुत गरेका थिए।
घरदैलो अभियानमा जितेन्द्र सोनल स्वयं सहभागी भई चुनावी कमाण्ड सम्हालेका छन्। उनले कार्यकर्ता तथा मतदातालाई जसपा नेपालको छाता चुनाव चिन्हमा मतदान गरी उम्मेदवार सन्जु साहलाई विजयी बनाउन आग्रह गरे।
फेटा बजार क्षेत्रमा आयोजित जनदर्शन कार्यक्रममा स्थानीयवासीको उल्लेखनीय उपस्थिति देखिएको थियो। निर्वाचन मिति नजिकिँदै जाँदा बारा–४ मा चुनावी माहोल थप तातिँदै गएको छ भने जसपा नेपालको घरदैलो अभियानले गति लिएको देखिन्छ।
