पर्सा । पर्सा निर्वाचन क्षेत्र नम्बर १ का प्रतिनिधि सभा सदस्य उम्मेदवार रामकिशोर सिंह (पराग)ले आज वीरगञ्ज महानगरपालिका वडा नम्बर ३२ अन्तर्गत रामबन र तेढा गाउँमा घरदैलो कार्यक्रम सम्पन्न गर्नुभएको छ।
घरदैलो कार्यक्रमका क्रममा उम्मेदवार सिंहले स्थानीयवासी तथा युवाहरूसँग प्रत्यक्ष भेटघाट गर्दै उनीहरूका गुनासा र समस्याहरू सुन्नुभयो। स्थानीयहरूले बस्ती व्यवस्थापन, नाला तथा सडकको विकास, शिक्षा र स्वास्थ्य सेवामा देखिएका समस्या बारे आफ्नो धारणा राखेका थिए।
सो अवसरमा युवाहरूले रोजगारीको अभावका कारण केही युवा लागुऔषधको चपेटामा परेको विषय उठाएका थिए। उम्मेदवार सिंहले उक्त समस्या गम्भीर रहेको बताउँदै आफू निर्वाचित भए लगत्तै युवाहरूका लागि रोजगारीका अवसर सिर्जना गर्ने, सीपमूलक तालिम र आत्मनिर्भर कार्यक्रममार्फत रोजगारीको बाटो खोल्ने प्रतिबद्धता व्यक्त गर्नुभयो।
कार्यक्रमका क्रममा स्थानीयवासीहरूले उज्यालो नेपाल पार्टीका अध्यक्ष कुलमान घिसिङ काम गर्ने व्यक्तित्व भएको उल्लेख गर्दै “तपाईं पनि जनताको हितमा काम गर्ने नेता बन्नुहोस्, हामी सबै तपाईंको साथमा छौं” भन्ने विश्वास व्यक्त गरेका थिए।
घरदैलो कार्यक्रममा स्थानीय युवाहरूको उल्लेख्य सहभागिता रहेको थियो भने उज्यालो नेपाल पार्टीप्रति जनसमर्थन बढ्दै गएको देखिएको छ।
