पर्सा। पर्सा निर्वाचन क्षेत्र नं. २ अन्तर्गत बहुदरमाई नगरपालिका वडा नं. २ को धायनसिंह पिपरा गाउँमा राष्ट्रिय स्वतन्त्र पार्टी (रास्वपा) ले प्रतिनिधिसभा निर्वाचनलाई लक्षित गर्दै घरदैलो कार्यक्रम सम्पन्न गरेको छ। कार्यक्रममा जेन्जी युवाहरूको उल्लेख्य सहभागिता रहेको थियो।
घरदैलो अभियानका क्रममा रास्वपाका नेताहरूले “हाम्रो लागि होइन, हाम्रो सन्ततिका लागि नयाँ नेतृत्व” भन्ने नारालाई केन्द्रमा राख्दै मतदातासँग प्रत्यक्ष संवाद गरेका थिए। उनीहरूले परम्परागत राजनीतिबाट देशले अपेक्षित परिवर्तन पाउन नसकेको उल्लेख गर्दै अब नयाँ सोच, नयाँ दृष्टिकोण र उत्तरदायी नेतृत्व आवश्यक रहेको धारणा व्यक्त गरेका छन् ।
कार्यक्रममा बोल्दै रास्वपाका प्रतिनिधिहरूले स्थानीय स्तरमै उच्च शिक्षाको पहुँच विस्तार, युवालाई रोजगारीका अवसर सिर्जना, महिलालाई स्वरोजगारमार्फत आर्थिक सशक्तीकरण तथा समृद्ध र आत्मनिर्भर समाज निर्माण गर्ने प्रतिबद्धता जनाएका छन्। साथै, शिक्षा, स्वास्थ्य, पूर्वाधार र रोजगारीका क्षेत्रमा व्यवहारिक र दीर्घकालीन विकास योजनाहरू अघि बढाइने जनाइएको छ।
घरदैलो अभियानमार्फत स्थानीय टोल–टोलमा सुशासन, पारदर्शिता र व्यवहारिक विकासको सन्देश प्रवाह गरिने र जनताको प्रत्यक्ष सुझावलाई नीतिगत प्राथमिकतामा समेटिने रास्वपाको भनाइ छ। कार्यक्रममा सहभागी स्थानीयवासीहरूले पनि नयाँ राजनीतिक शक्तिप्रति चासो र अपेक्षा व्यक्त गरेका थिए।
