बारा — परवानीपुर गाउँपालिकाले आर्थिक वर्ष २०८२र८३ का लागि ३४ करोड ३४ लाख रुपैयाँभन्दा बढीको अनुमानित बजेट सार्वजनिक गरेको छ। सोमबार सम्पन्न १६औं गाउँसभा अधिवेशनमा उपाध्यक्ष सुगान्धी देवी कानुको तर्फबाट प्रमुख प्रशासकीय अधिकृत मुन्ना साह रौनियारले बजेट प्रस्तुत गरे।
प्रमुख प्रशासकीय अधिकृत रौनियारका अनुसार आगामी वर्षको बजेटमा शिक्षा, स्वास्थ्य, कृषि तथा पूर्वाधार विकाससँगै महिला र युवालाई लक्षित कार्यक्रमहरूमा विशेष जोड दिइएको छ। बजेटले समावेशी र समन्यायिक विकासको अवधारणालाई आत्मसात् गर्दै मानव विकास सूचकमा सुधार ल्याउने रणनीति लिएको छ।
गाउँसभा सम्वोधन गर्दै अध्यक्ष रामक्षत्री कुर्मीले गाउँवासीको जीवनस्तर सुधार गर्ने उद्देश्यले विभिन्न जनमुखी योजना समेटिएको जानकारी दिए।
अध्यक्ष कुर्मीको अध्यक्षतामा आयोजित सभामा उपाध्यक्ष कानु, प्रमुख प्रशासकीय अधिकृत रौनियार, वडाध्यक्षहरू, कार्यपालिका सदस्य, वडासदस्य, कर्मचारी तथा सरोकारवाला पक्षको सक्रिय उपस्थिति थियो।
