वीरगञ्ज । बाराको परवानीपुरमा मनोरञ्जका लागि ‘वाटर पार्क’ सन्चालनमा आएको छ । व्यवसायिक घराना चाचान ग्रुपले ७ करोड रुपैयाँको लगानीमा ‘थ्रिल वाटर पार्क’सञ्चालनमा ल्याएको हो ।
परवानीपुर गाँउपालिका वडा नम्बर ४ लिपनीमालस्थित वीरगञ्ज पथलैया सडक खण्ड छेउमै सञ्चालनमा ल्याइएको उक्त वाटर पार्कको शुक्रबार चाचान ग्रुपका अध्यक्ष बाबुलाल चाचानले उद्घाटन गरे ।
परवानीपुरमा शुक्रबारदेखि सञ्चालनमा ल्याइएको ‘थ्रिल वाटर पार्क’ मधेश प्रदेशकै पहिलो वाटर पार्क भएको सञ्चालक निखिल चाचानले बताए । उनले भने, ‘काठमाडौं, चितवन, भक्तपुर बाहेक मधेश प्रदेशमै यो पहिलो वाटर पार्क हो ।’
बालबालिकादेखि बृद्धबृद्धासम्मलाई लक्षित गरि सञ्चालनमा ल्याइएको ‘थ्रिल वाटर पार्क’ स्वीमिङ पुल, पानीको फोहोराले मसाज गर्ने ‘ज्याक उ पुल’ समुन्द्रको जस्तो छाल आउने ‘वेभ पुल’, ‘रेन डान्स’, ‘ट्याप डूर स्लाइड’ का साथै रेष्टुरेण्ट पनि सञ्चालनमा ल्याइएको चाचानले बताए । उनले भने, ‘पर्सा, बारा, मकवानपुरका साथै भारत बिहारको रक्सौल, बेतिया र मोतिहारीसम्मका स्थानीयलाई लक्षित गरि यो वाटर पार्क खोलिएको हो ।’
वाटर पार्कमा बालबालिकाका लागि प्रति व्याक्ति ५ सय र वयष्कका लागि प्रति व्याक्ति ७ सय रुपैयाँ शुल्क तोकिएको उनले जानकारी गराए । चाचानकाअनुसार थ्रिल वाटर पार्क मा २२ जनाले रोजगारी पनि पाएका छन् ।
अहिले वाटर पार्ककै छेउमा चाचान ग्रुपले यसअघि साहसिक मनोरञ्जनात्मक खेलसहितको रमाइलो गर्न ‘थ्रिल फयाक्ट्री’ ८ महिना पहिले सञ्चालनमा ल्याइसकेको छ । ‘थ्रिल फयाक्ट्री ’मा ८ महिनाको अवधीमा २२ हजार भन्दा बढिले अवलोकन गरिसकेको सञ्चालक चाचानले बताए । उनले भने, ‘८ महिना पहिले ‘थ्रिल फयाक्ट्री’ सञ्चालनमा ल्यायौं, त्यसको कारोबारबाट उत्साहित भएर नै अहिले ‘वाटर पार्क’ सञ्चालनमा ल्याएका हौं ।’
