वीरगञ्ज । वीरगञ्जस्थित रानीघाट चोकमा आयोजित रक्तदान कार्यक्रम सम्पन्न भएको छ । दूर्गा पूजा सेवा समिति रानीघाटले शनिबार आयोजना गरेको कार्यक्रममा ७० पिन्ट रगत सङ्कलन भएको आयोजकले जनाएका छन् ।
समितिका अध्यक्ष सतिश सिंह राजपुतको सभापतित्व एवम् नेपाली कांग्रेसका नेता तथा वीरगञ्ज उद्योग वाणिज्य सङ्घका सदस्य पन्नालाल साहको प्रमुख आतिथ्यमा आयोजित कार्यक्रममा ७ महिलासहित ७० जनाले रक्तदान गरेका छन् ।
समितिले प्रत्येक ६ महिनामा नयाँ वर्ष र दशैँको अवसरमा रक्तदान कार्यक्रमको आयोजना गर्दै आएको छ । यसपटक नेपाली नयाँ वर्षको अवसरमा १९ औँ पटक रक्तदान आयोजना गरिएको अध्यक्ष राजपुतले जानकारी दिए ।
दूर्गा पूजा सेवा समितिको नामबाट विक्रम सम्वत् २०८० सम्म एम्बुलेन्स खरिद गरेर सञ्चालन गर्ने उद्देश्यसहित रक्तदान आयोजना हुँदै आएको उनले बताए । उनले यसपटक दशैंमा आफूहरुले हालसम्म सङ्कलित चन्दाको रकमबाट एम्बुलेन्स खरिद गर्नेप्रयास गरीरहेको बताए ।
