साहिब दरबारको न्यानो कपडा उपलब्ध गराउने अभियान निरन्तर, मंगलबार राति ५० जनालाई उपलब्ध गराइयो न्यानो कपडा

वीरगञ्ज,२७ पुष । साहिब दरबार सेवा संस्थानले वीरगञ्जमा खुला आकासमा रात विताउन बाध्य भएकाहरुका लागि न्यानो कपडा वितरण गर्ने अभियानलाई निरन्तरता दिएको छ ।
कठ्याङ्ग्रिँदो चिसोमा पनि सडक पेटी र खुला आकाशमा रात विताउन बाध्य भएकाहरुलाई चिसोबाट बँच्न संस्थानले न्यानो कपडा वितरण अभियानलाई निरन्तरता दिएको हो ।
संस्थानले मंगलबार राति वीरगञ्जका विभिन्न स्थानमा पुगेर सडक पेटीमा रात विताइरहेकाहरुलाई न्यानो कपडा (कम्बल) उपलब्ध गराएको छ ।
वीरगञ्जको माइस्थान, घण्टाघर, आदर्शनगर, बसपार्क, छपकैया, विर्ता, गण्डक, भन्सार लगायतका स्थानमा खुला आकासमुनी र सडक पेटीमा सुतिरहेका करिब ५० जनालाई न्यानो कपडा उपलब्ध गराइएको हो ।
चिसोकै कारण कसैले ज्यान गुमाउन नपरोस भन्ने अभिप्रायले न्यानो कपडा उपलब्ध गराइएको संस्थानका अध्यक्ष उमेशलाल सहनीले बताए ।
विशेषगरेर रिक्सा, ठेला चालक तथा विपन्न व्यक्तिहरु सडक पेटीमै रात गुजार्न बाध्य छन् ।
रातको समयमा चिसो झनै बढ्ने भएकाले सडक पेटी र खुला स्थानमा रात बिताउन बाध्य ब्यक्तिहरुको जीवन रक्षाका लागि आफुहरुले न्यानो कपडा उपलब्ध गराउन थालेको संस्थानका रुपेशमान सिंहले बताए ।
शुक्रबारदेखि संस्थानले न्यानो कपडा उपलब्ध गराउने अभियान चलाएको र मंगलबार तेस्रो दिन ५० जनालाई उपलब्ध गराइएको संस्थानका महासचिव जयप्रकाश महतोले जानकारी दिए ।
मंगलबार राति न्यानो कपडा वितरण गर्न संस्थानका अध्यक्ष सहनी, समाजसेवी रुपेशमान सिंह, अफरोज आलम, हफिज मियाँ लगायतको सहभागिता रहेको थियो ।