वीरगञ्ज व्यवस्थित बनाउने अभियान अन्र्तगत ट्राफिक व्यवस्थापनका लागि सरोकारवाला सक्रिय

२२ मंसिर, वीरगंज
वीरगञ्ज व्यवस्थित बनाउने अभियान अन्र्तगत ट्राफिक व्यवस्थापनका लागि सरोकारवाला सक्रिय भएका छन् । वीरगञ्ज बजार क्षेत्रको पार्किङ्गको समस्यालाई समाधान गर्न सरोकारवाला सक्रिय भएका हुन् । सोही क्रममा वीरगञ्ज महानगरपालिका, जिल्ला ट्राफिक प्रहरी कार्यालय पर्सा, वडा प्रहरी कार्यालय विर्ता, सामुदायिक सेवा केन्द्र लगायत विभिन्न संघ संस्थाका प्रतिनिधिहरुले ट्राफिक व्यवस्थापनका सम्बन्धमा आज छलफल गरेका छन् ।
वडा प्रहरी कार्यालय विर्तामा बसेको बैठकले पार्किङ्ग स्थल निर्धारण गर्नुको साथै केहि स्थानको सडकमा पार्किङ निषेध गर्ने निर्णय समेत गरेको छ । विर्तास्थित वीरगञ्ज उद्योग वाणिज्य संघदेखि मकालु चौक, आदर्शनगर माइस्थानसम्म र घण्टाघरदेखि लिंक रोडमा दुवै तर्फ चार पाङ्ग्रे सवारी साधनको पार्किङ्ग निषेध गर्ने निर्णय बैठकले गरेको ग्रिनसिटी सामुदायिक सेवा केन्द्र आदर्शनगरका अध्यक्ष जयप्रकाश खेतानले बताउनुभयो ।
आदर्शनगर क्षेत्र र आदर्शनगरदेखि अलखियामठसम्म मुख्य सडकमा मोटरसाईकल समेत पार्किङमा रोक लगाउने निर्णय बैठकले गरेको छ । सवारी व्यवस्थापनका लागि बिर्ता स्थित मालपोत कार्यालय अगाडिको खाली जमिन, हजारी मल ट्रष्टको जमिन, पूरानो बस पार्क, गीता मन्दिर छेउको खाली जमिन र घण्टाघर नजिकको बी।पी उद्यानको खाली जमिनमा पार्किङ्ग गर्ने व्यवस्था मिलाइएको वडा प्रहरी कार्यालय विर्ताका प्रमुख प्रहरी निरीक्षक बिशाल मल्लले जानकारी दिनुभयो ।
निर्णय कार्यन्वयनका लागि वीरगञ्ज महानगरपालिकाबाट नगर प्रहरी, ट्राफिक प्रहरी परिचालन हुनेछन् । जिल्ला ट्राफिक प्रहरी कार्यालय पर्साका प्रमुख प्रहरी निरीक्षक ध्रुब प्रसाद दाहाल वीरगञ्ज व्यवस्थित बनाउन अभियान थालिएको बताउनुभयो । तोकिएको ठाउँमा सवारी पार्किङ गर्दा सहरको सुन्दरता बढ्ने वीरगञ्ज– ४ का वडा अध्यक्ष जगत साह कानुले बताउनुभयो ।