वीरगञ्जमा विपद सम्बन्धी कृतिम घटना अभ्यास तथा तालिम सम्पन्न भएको छ । नेपाल रेडक्रस सोसाईटी पर्सा, ग्रिनसिटी सामुदायिक सेवा केन्द्र आदर्शनगरको सहयोगमा जिल्ला विपद व्यवस्थापन समिति पर्साले अभ्यास तथा तालिमको आयोजना गरेको छ ।
वीरगञ्ज–१० पुरानो बस पार्कमा विपत पूर्व तयारीको अभ्यास प्रदर्शन गर्नुको साथै आगलागी कसरी नियन्त्रण गर्ने भन्ने बारेमा जानकारी गराईएको ग्रिनसिटी सामुदायिक सेवा केन्द्रका अध्यक्ष जय प्रकाश खेतानले जानकारी दिए । शुभ दिपावली तथा छठ पर्वमा आगलागीका घटना हुने गरेकोले त्यसको पूर्व सन्ध्यामा कृतिम घटना अभ्यास तथा तालिम सञ्चालन गरिएको उनले बताए ।
कार्यक्रममा ग्यास सिलिण्डरमा आगो लाग्दा कसरी निभाउने ? भान्सामा आगो लाग्दा कसरी सुरक्षित तरिकाले निभाउने, दिपावली तथा छठ पुजामा पटाका पड्काउदा हुन आगलागीका घटना र सुरक्षित रहने उपायका बारेमा कृत्तिम अभ्यास तथा तालिम सञ्चालन गरिएको थियो । ग्रिन सिटी सामुदायिक सेवा केन्द्रले विभिन्न सरोकारवाला निकायसँगको समन्वयमा समय समयमा विपद जोखिम न्युनीकारणका लागि कृत्तिम अभ्यास गर्दै आएको छ । कार्यक्रममा वीरगञ्ज महानगरपालिकाका उप मेयर इम्तियाज आलम, प्रमु्ख जिल्ला अधिकारी उमेश ढकाल लगायतको सहभागीता रहेको थियो ।
