हेटौंडा — बारा र मकवानपुरको सिमाना नजिक चुरियामाई उकालोमा बुधबार बिहान बस र मोटरसाइकलहरूबीच भएको दुर्घटनामा दुई जनाको ज्यान गएको छ भने चार जना घाइते भएका छन्।
जनकपुरबाट काठमाडौंतर्फ गइरहेको ना। ७ ख ८५३७ नम्बरको यात्रुबाहक बस चुरियामाई मन्दिर नजिकैको उकालोमा अचानक ब्रेक फेल भएर ब्याक हुँदै जाँदा पछाडिबाट आइरहेका दुईवटा मोटरसाइकलमा ठक्कर दिएको जिल्ला प्रहरी कार्यालय बाराका प्रहरी निरीक्षक दिलीपकुमार थापाले जानकारी दिए।
दुर्घटनामा परी दुईवटा छुट्टाछुट्टै परिवारका ६ जना घाइते भएका थिए। घाइतेमध्ये बाराको फेटा गाउँपालिका–१ का २५ वर्षीय मकेश्वर पटेल र वीरगन्ज–३१ की २६ वर्षीया कविता देवीको उपचारका क्रममा बाटोमै मृत्यु भएको हो।
मृतकको परिचय ,मकेश्वर पटेल — मोटरसाइकल नम्बर ना. १२ प ३३६० का चालक, फेटा गाउँपालिका–१, भरवलिया निवासी र कविता देवी — मोटरसाइकल नम्बर मधेश प्रदेश ०३–०२४ प ४४९५ की सवार, वीरगन्ज–३१ निवासी दुर्घटनामा मकेश्वर पटेलकी श्रीमती २२ वर्षीया कलिता देवी र २० महिनाकी छोरी तानेया पटेल घाइते भएका छन्, जसको उपचार मकवानपुरको सहकारी अस्पतालमा भइरहेको छ।
त्यस्तै, मृतक कविता देवीका पति २७ वर्षीय कञ्चनकुमार पटेल र तीन वर्षीय छोरा आयुष पटेल पनि घाइते भएका छन्। उनीहरूलाई पनि सहकारी अस्पतालमा भर्ना गरिएको छ।
घटनापछि बसका चालक सर्लाहीको लालबन्दी नगरपालिका–निवासी ४७ वर्षीय विश्वनाथ चौधरी फरार भएका थिए। उनलाई प्रहरीले नियन्त्रणमा लिएको छ।
