वीरगञ्ज।
प्रकृति सेवा प्रतिष्ठान, नेपालले श्री शारदा माध्यमिक विद्यालयको सहकार्यमा वातावरण दिवस २०८२ को अवसरमा आयोजना गरिएको पाँच दिने कार्यक्रम अन्तर्गत दोस्रो दिन पनि घरदैलो, सरसफाइ तथा जनचेतनामूलक कार्यक्रम सम्पन्न गरेको छ।
सोमबार बिहान ६ बजे सुरु भएको सरसफाइ अभियान विद्यालय परिसरदेखि अलौको बाहिरी मुख्य सडक, चौक, पसल तथा टोलको भित्री भागसम्म फैलिएको थियो। कार्यक्रमको नेतृत्व प्रतिष्ठानका संस्थापक अध्यक्ष सरदार जसपाल सिंहले गरेका थिए भने विद्यालयका प्रधानाध्यापक अनिल वर्णवाल, समाजसेवी भगवान श्रेष्ठ, सहसचिव अभिनाश झा, सदस्य भोला प्रसाद, केदार गुप्ता, साबिर अंसारी, शिक्षक तथा कक्षा ९ र १० का विद्यार्थीहरूको उल्लेखनीय उपस्थिति रहेको थियो।
कार्यक्रमका क्रममा सहभागीहरूले सरसफाइ मात्र नभई जनचेतनामूलक सन्देशहरू पनि प्रवाह गरेका थिए। कतै व्यंग्य शैलीमा त कतै मार्मिक सन्देशसहित, विद्यार्थीहरूले हाँसखुसीको साथमा आम सर्वसाधारणलाई प्रकृति संरक्षण र सरसफाइको महत्वबारे जानकारी दिँदै वातावरण प्रतिको सम्मानमा एकजुट हुने आह्वान गरेका थिए।
श्री शारदा विद्यालयका प्रधानाध्यापक अनिल वर्णवालले कार्यक्रममा भने,
> “प्रकृति बिना पृथ्वी वा मानव जीवनको कल्पना गर्न सकिँदैन। यदि हामीले आफ्नो वरिपरि सफा राखेर प्रकृतिको सम्मान गर्न सिक्यौं भने, हामी पनि स्वस्थ जीवनयापन गर्न सक्छौं।”
संस्थापक अध्यक्ष सरदार जसपाल सिंहले भने,
> “यस वर्ष जेष्ठ १८ देखि २२ गतेसम्म हरेक बिहान ६ बजे विभिन्न स्थानहरूमा सरसफाइ, जनचेतना र प्रकृति प्रतिको जिम्मेवारीबारे सचेतना फैलाउने उद्देश्यले कार्यक्रम सञ्चालन भइरहेको छ। आजको कार्यक्रमले आम नागरिकमा सकारात्मक प्रभाव पार्न सफल भएको छ।”
कार्यक्रमको सफलतामा सहभागी विद्यार्थी, शिक्षक, विद्यालय प्रशासन र प्रतिष्ठानका पदाधिकारीप्रति सिंहले आभार व्यक्त गर्दै आगामी दिनहरूमा अझ प्रभावकारी ढंगले कार्यक्रम विस्तार गरिने प्रतिबद्धता जनाए।
👉 यस प्रकारको सहकार्य र सचेतनामूलक अभियानले समुदायमा वातावरणीय जिम्मेवारीबोध बढाउँदै प्रकृति संरक्षणमा महत्वपूर्ण भूमिका निर्वाह गर्ने विश्वास आयोजक संस्थाको रहेको छ।
