वीरगञ्ज । गर्मी बढ्दै गएपछि वीरगञ्ज पब्लिक कलेजका विद्यार्थीले नि:शुल्क खानेपानी र जुस वितरण गरेका छन् ।
वीरगञ्जसहित तराई-मधेशका अधीकांस जिल्लामा तापक्रमसँगै गर्मी बढ्दै गएपछि बटुवाहरुका लागि उचित खानेपानीको व्यवस्था नभएपछि विद्यार्थीले नि:शुल्क खानेपानी र जुस वितरण सुरु गरेका हुन् ।
कलेजअन्तर्गत रहेको विपिसी आइटी क्लबसँग आबद्ध विद्यार्थीले आइतबार वीरगञ्जको घण्टाघर चोकमा आवाजजावत गरिरहेका बटुवा, रिक्साचालक, ठेला तान्ने, दैनिक ज्यालादारी गर्ने मजदूर र अन्य सर्वसाधारणलाई समेत नि:शुल्क रुपमा खानेपानी र जुस वितरण गरेको कलेजका प्रशासन प्रमुख शङ्कल्प शाक्यले बताए ।
शाक्यकाअनुसार विद्यार्थीले बिहान ११ बजेदेखि अपराहन्न ३ बजेसम्म चार हजारभन्दा बढीलाई पानी र जुस प्रदान गरेका छन् । ‘गर्मी धेरै बढेपछि हामीले आफ्नो सामाजिक उत्तरदायित्व निभाउन पानी र जुस वितरण कार्यक्रम सञ्चालन गरेका हौँ,’ शाक्यले भने, ‘भोली, पर्सी पनि गर्मी वितरण कार्यक्रमलाई हामीले निरन्तरता दिनेछौँ ।’
चापाकल सुकिरहेको अवस्थामा समेत सम्बन्धित निकायले बटुवा र दैनिक ज्यालादारी गर्नेहरुका लागि खानेपानीको उचित व्यवस्थापन गर्न नसकेपछि आफूहरुले स्थानीय संस्था र दाताहरुको सहयोगमा कार्यक्रम सञ्चालन गरेको विपिसी आइटी क्लबका अध्यक्ष अमन सिद्द्कीले बताए । सिद्द्कीले पनि आवश्यकता भए आगामी दिनमा पनि वितरण कार्यक्रमलाई निरन्तरता दिने बताए ।
वीरगञ्ज पब्लिक कलेज, वीरगञ्ज जेसिस, वैष्णवी ज्वेलर्स र अनुप अग्रवाको व्यक्तिगत आर्थिक सहयोग र विपिसी आइटी क्लबका प्रसान्त सर्राफ, आशुतोष यादव, पप्पु रौनियार, मेघा गुप्ता, अन्जली सिंह, आरती झा, आकाश दास र अनिशा लुइँटेलको उपस्थितिमा खानेपानी र जुस वितरण गरिएको क्लबका अध्यक्ष सिद्द्कीले जानकारी दिए ।
