वीरगञ्ज । वीरगञ्ज महानगरपालिका वडा नम्बर १६ नगवामा कृषि बजार निर्माण गर्न थालिएको छ।
पर्सा क्षेत्र नम्बर १ का प्रतिनिधि सभा सदस्य (सांसद) प्रदीप यादव र वीरगञ्ज महानगरपालिकाका मेयर राजेशमान सिंहको पहलमा किसानहरुले उत्पादन गर्ने कृषि उपज बिक्री वितरणका लागि नगवामा थोक कृषि बजार निर्माण गर्न थालिएको हो।
बुधबार पूर्व वन तथा वातावरण मन्त्रीसमेत रहेका सांसद यादवले कृषि बजारको शिलान्यास गरेका छन्। त्यस अवसरमा वीरगञ्ज महानगरका मेयर सिंह, वडा नम्बर १६ का वडाअध्यक्ष परशुराम चौरसिया, वडा सदस्यलगायत स्थानीय बुद्धिजीवी, कृषक , समाजसेवी र राजनीतिक दलका प्रतिनिधिहरुको पनि उपस्थिति थियो।
पूर्वमन्त्री यादव र मेयर सिंहको पहलमा मधेस प्रदेश सरकारले उपलब्ध गराएको ३ करोड रुपैयाँको लागतमा कृषि बजार निर्माण गर्न लागिएको मेयर सिंहका स्वकीय सचिव सत्यराज घिमिरले जानकारी दिए।
कृषि बजार निर्माणकार्यको ठेक्का दीप तामाकोशअं कन्ट्रक्शन प्रालि भक्तपुरले सकारेको छ। आगामी असार मसान्तभित्र निर्माणकार्य सम्पन्न गरिसक्नुपर्ने सम्झौतामा उल्लेख छ।
कृषि बजारमा कृषि सेड, कंक्रिट पेभर, शौचालय लगायतका संरचना निर्माण गरिने घिमिरेले जानकारी दिए।
