वीरगञ्ज । राष्ट्रपति रामचन्द्र पौडेलले नागरिकता विद्येयक प्रमाणीकरण गरेका छन् ।
राष्ट्रपतिको कार्यालय स्रोतका अनुसार राष्ट्रपति पौडेलले बुधबार बिहान नागरिकता विधेयक प्रमाणीकरण गरेका हुन् ।
‘नागरिकता विद्येयकले वैद्यानिकता पायो’, स्रोतले भन्यो, ‘राष्ट्रपतिज्यूले विद्येयक प्रमाणीकरण गर्नुभयो ।’
यसअघिका राष्ट्रपति विद्यादेवी भण्डारीले संसद्बाट दुई–दुईपटक पारित गरेर पठाउँदा पनि प्रमाणीकरण नगरिदिँदा नागरिकता विद्येयक शीतल निवासमै अड्किएको थियो ।
वर्तमान सरकारले सो नागरिकता विद्येयक प्रमाणीकरणका लागि यही जेठ १२ गते राष्ट्रपति पौडेललाई आग्रह गर्ने निर्णय गरेको थियो ।
यसअघि २०७९ साउन २९ गते संघीय संसद्का दुवै सदनबाट पारित विद्येयक तत्कालिन राष्ट्रपति भण्डारीले फिर्ता पठाएकी थिइन् । त्यसपछि फेरि भदौ २० गते संसद्का दुवै सदनबाट पारित गरी प्रमाणीकरणका लागि पठाएको विद्येयक भण्डारीले असोज ५ गतेसम्म त्यसै रोकेकी थिइन् ।
उनलाई दोस्रोपटक विद्येयक प्रमाणीकरण गर्नैपर्ने संवैधानिक बाध्यता थियो । तर, भण्डारीले त्यसै समय गुजारिन् र विद्येयक शीतल निवासमै अड्काएकी थिइन् ।
सोही रोकिएको विद्येयकलाई अहिलेका राष्ट्रपति पौडेलले प्रमाणीकरण गरेका हुन् ।
विद्येयक प्रमाणिकरण भएसँगै वीरगञ्जसहित मधेशमा रहेका नागरिकताविहिनहरु खुशी भएका छन् । बैंक खाता, अध्ययन, बैदेशिक रोजगार लगायत राज्यबाट प्राप्त हुने सेवा सुविधाबाटसमेत बञ्चित भएका नेपालीहरुले अब नागरिकता पाउने भएका छन् ।
