वीरगञ्ज । वीरगञ्ज कृषि औजार कारखानालाई सञ्चालनका लागि सांसद् कृष्ण कुमार (किसान) श्रेष्ठले सरकारलाई ध्यानाकर्षण गराएका छन् ।
प्रतिनिधिसभाको बैठकमा सहभागी हुँदै बारा क्षेत्र नम्बर ४ बाट निर्वाचित प्रतिनिधिसभा सदस्य श्रेष्ठले वीरगञ्ज कृषि औजार कारखानाको सञ्चालनका लागि सरकारलाई गम्भिर हुन आग्रह गरेका छन् ।
औद्योगिक र कृषि क्षेत्रको विकासका लागि महत्वपूर्ण मानिने कारखानाले विभिन्न उतारचढाव व्यहोर्नु परेको स्मरण गर्दै अब सरकारले निरन्तर रुपमा सञ्चालन गर्नुपर्ने पूर्व मन्त्रीसमेत रहेका श्रेष्ठको भनाई छ ।
२०२४ सालमा स्थापना भएको उद्योगलाई सरकारले २०५४ सालमा निजी क्षेत्रलाई दिएको र २०५८ सालमा फेरी आफ्नै स्वामित्वमा ल्याएदेखि ५९ सालमा कारखाना नै खारेज गरिएको स्मरण गरे ।
तत्कालिन अर्थमन्त्री जनार्दन शर्माको पालामा १० वर्षका लागि खर्च र स्वामित्व सरकारकै हुने गरी महाविर पुन नेतृत्वको राष्ट्रिय आविष्कार केन्द्रलाई लिजमा दिइएपनि सञ्चालन खर्च, विद्युत खर्च लगायतका आधारभूत व्यवस्था नगरिएकोप्रति आपत्ती जनाए ।
कारखानालाई पुरानै अवस्थामा कृषि औजार उत्पादन गर्न सक्ने गरी व्यवस्थापन गरिनुपर्ने सांसद श्रेष्ठको माग छ । वीरगञ्ज कृषि औजार कारखाना मधेश प्रदेश र वीरगञ्जको मात्रै नभएर मुलुकलाई नै समृद्धीको बाटोमा लैजाने कारखाना भएको उनको भनाई छ ।
