वीरगञ्ज । वीरगञ्जबाट नारायणघाटतर्फ जाँदै गरेको मालबाहक कन्टेनरबाट जिल्ला प्रहरी कार्यालय पर्साले लाखौ मूल्य बराबरको सामग्री बरामद गरेको छ ।
वडा प्रहरी कार्यालय विर्ताबाट खटिएको टोलीले वीरगञ्ज महानगरपालिका वडा नम्बर १६ बोखार चोकस्थित सडकखण्डबाट ना.३ ख७७४१ नम्बरको मालवाहक ट्रकसहित विभिन्न सामग्री नियन्त्रणमा लिएको हो ।
विलविजकभन्दा बढी मालबस्तु लोड रहेको सूचनाको आधारमा खटिएको टोलीले चेकजाँच गर्दा विलबिजक शंकास्पद देखिएको वडा प्रहरी कार्यालय विर्ताका प्रमुख प्रहरी निरीक्षक बिदुर शिवाकोटीले जानकारी दिए ।
प्रहरी निरीक्षक शिवाकोटीकाअनुसार अनुमानीत ६३ लाख मूल्य बराबरको ट्रक र सो ट्रक भित्र लोड रहेको मोबिल, तथा विभिन्न खुद्रा सामग्री बरामद गरिएको हो । बरामद सामग्रीलाई आवश्यक कारवाहीका लागि ट्रकसहित राजश्व अनुसन्धान कार्यालय पथलैया बारामा बुझाइएको पर्साका प्रहरी प्रवक्ता प्रहरी नायब उपरीक्षक दिपक गिरीले जानकारी दिए ।
वडा प्रहरी कार्यालय विर्ताबाटै खटिएको टोलीले वीरगञ्ज महानगरपालिका वडा नम्बर ४ रेल्वेरोडस्टित सडकखण्डबाट पनि विभिन्न सामग्रीसहितको कन्टेनर नियन्त्रणमा लिएको छ ।
वीरगञ्जबाट सिराहाको लहानतर्फ जाँदै गरेको ना.३ ख ६९९ नम्बरको मालवाहक कन्टेनरले विलबिजकभन्दा बढी सामान बोकेको सूचनाको आधारमा चेकजाँच गरिएको प्रहरी निरीक्षक शिबाकोटीले बताए ।
चेकजाँचका क्रममा विलबिजक शंकास्पद देखिएको हुँदा ५८ लाख मूल्य बराबरको कन्टेनर र हार्डवेयर तथा खुद्रा सामग्री नियन्त्रणमा लिइएको छ । नियन्त्रीत कन्टेनरलाई सामग्रीसहित राजश्व अनुसन्धान कार्यालय पथलैया बारामा बुझाइएको जिल्ला प्रहरी कार्यालय पर्साका प्रवक्ता एवम् प्रहरी नायब उपरीक्षक दिपक गिरीले जानकारी दिए ।
