बर्दियामा प्रहरीले भारी परिमाणमा चिरान काठ बरामद गरेको छ । मधुवन नगरपालिका वडा नम्बर ३ बाट सिसौ, साल, खयर जातका अवैध चिरानी गरेका काठ प्रहरीले नियन्त्रणमा लिएको हो ।
जिल्ला प्रहरी कार्यालय बर्दिया मातहत ईलाका प्रहरी कार्यालय ढोढरी बर्दियाबाट प्रहरी निरीक्षक बखतबहादुर शाहीको कमाण्डमा खटिएको प्रहरी टोली तथा सब वन डिभिजन कार्यालय खाता बर्दियाका वन अधिकृत सन्तोष चौधरी समेतको टोलीले शनिबार बेलुकी अवैध काठ बरामद गरेको जिल्ला प्रहरी कार्यालय बर्दियाका प्रहरी नायव उपरीक्षक हिक्मतबहादुर बोहराले जानकारी दिए ।
मधुवन निवासी स्थानीय धर्मबहादुर खत्रीको खाली घर, तथा निजको मकैवारी, विपतपुरस्थित बालकुमारी समील तथा फर्निचर उद्योगबाट २ सय ८३ दशमलव ६१ क्युफिट काठ बरामद भएको हो।
काठको मूल्य १४ लाख ६५ हजार ५५५ रुपैयाँ हुनआउँछ। बरामद काठ सव डिभिजन वन कार्यालय सानोश्री बर्दिया बुझाएको प्रहरीले जनाएको छ।
