वीरगञ्ज,२२चैत । वीरगञ्ज कारागारमा रमजानमा गरेका मुस्लिम कैदीबन्दीलाई साँझको इफ्तारी गर्न वीरगञ्ज महानगरपालिकाका प्रमुख राजेशमान सिंहले खाद्य सामग्री उपलब्ध गराउनुभएको छ ।
कारागारमा रहेका करिब २ सय मुस्लिम कैदीबन्दीलाई पुग्ने सामग्री उहाँले व्यक्तिगत रुपमा उपलब्ध गराउनुभएको हो ।
महानगरप्रमुख सिंहले पठाउनु भएको सामग्री कारागार प्रशासनका फिरोज अन्सारीलाई हस्तान्तरण गरिएको प्रमुख सिंहका प्रतिनिधि अफरोज आलमले जानकारी दिनुभयो ।
इफतारीका लागि आवश्यक पर्ने चिउरा, भुजा, मिठा, तेल, तथा अन्य खाद्य सामग्री उपलब्ध गराइएको आलमले जानकारी दिनुभयो ।
मुस्लिम समूदायको महत्वपूर्ण चाड रमजान चलिरहेको छ । एक महिनासम्म चल्ने रमजानका बेला मुस्लिम समूदाय दिनभर पानी समेत नखाई निराहार बस्ने परम्परा छ । साँझ भने इफ्तारी गर्ने गर्दछन् । कारागारमा कैदी जीवन विताई रहेकालाई इफ्तारी गर्न खाद्य सामग्री अभाव नहोस भनेर महानगर प्रमुख सिंहले व्यक्तिगत रुपमा सहयोग उपलब्ध गराउनुभएको हो ।
