वीरगञ्ज । जिल्ला प्रशासन कार्यालय पर्साले नयाँ वर्षदेखि नयाँ भवनबाट सेवा प्रवाह गर्ने तयारी थालेको छ ।
पूरानो तथा जीर्ण अवस्थामा रहेको भवनबाट सेवा प्रवाहमा कठीनाई भएको भन्दै नयाँ भवन निर्माणको थालनी गरिएको थियो । नयाँ भवन निर्माणको काम सम्पन्न भएसँगै अहिले कार्यालयका लागि आन्तरिक व्यवस्थापनको काम धमाधम भइरहेको जिल्ला प्रशासन कार्यालय पर्साका सहायक प्रमुख जिल्ला अधिकारी भिमकान्त पौडेलले जानकारी दिए ।
सूचना अधिकारीसमेत रहेका पौडेलकाअनुसार भरसक नयाँ वर्ष २०८० देखि नत्र नयाँ वर्षको पहिलो सातासम्ममा नयाँ भवनमा सर्ने तयारी छ । नयाँ भवनमा सरेसँगै सेवा प्रवाह पनि छिटो छरितो एवम् चुस्त दुरुस्त हुने सहायक प्रमुख जिल्ला अधिकारी पौडेलको विश्वास छ ।
अहिले सेवाग्राहीलाई पनि सेवा लिन असहज हुने र कार्यालयमा भिड हुने समस्या पनि नयाँ भवनमा सरेसँगै समाधान हुने पौडेलको भनाई छ । उनले भने, ‘अहिलेको भवन धेरै पूरानो भइसकेको छ, व्यवस्थित पनि छैन । हामीलाई काम गर्न पनि असहज भइरहेको छ । अब नयाँ भवन निर्माण भएसँगै आन्तरिक व्यवस्थापनको काम भइरहेको छ । नयाँ वर्षदेखि नयाँ भवनबाट नयाँ जोश र जाँगरका साथ सेवा प्रवाह गर्ने हाम्रो तयारी छ ।’
