वीरगञ्ज । स्वर्गीय नरेश सर्राफ स्मृति क्रियाशिल पत्रकारिता पुरस्कारबाट सञ्चारकर्मी राजेन्द्र सिंह सम्मानित भएका छन् ।
नेपाल पत्रकार महासंघ पर्साले महासंघको ६८ औँ स्थापन दिवसको अवसरमा आयोजना गरेको कार्यक्रममा सञ्चारकर्मी सिंहलाई २० हजार रुपैयाँ नगदसहित स्वर्गीय नरेश सर्राफ स्मृति क्रियाशिल पत्रकारिता पुरस्कारबाट सम्मानित गरिएको हो ।
सिंहलाई पर्साका प्रमुख जिल्ला अधिकारी एवम् कार्यक्रमका प्रमुख अतिथि हिरालाल रेग्मीले सम्मानपत्र र रकम बराबारको चेक हस्तान्तरण गरेको नेपाल पत्रकार महासंघ पर्साले जनाएको छ ।
नेपाल पत्रकार महासंघ पर्सा शाखाले गत शनिबार मात्रै बैठक गरेर सिंहलाई यो पुरस्कार दिने निर्णय गरेको थियो । युवा सञ्चारकर्मी स्वर्गीय नरेश सर्राफको स्मृतिमा यस वर्षदेखि पुरस्कार वितरण गर्न थालिएको हो । अब प्रत्येक वर्ष ४० वर्ष उमेर नकटेका सञ्चारकर्मीलाई पुरस्कार वितरण गरिने महासंघका अध्यक्ष अनुप तिवारीले जानकारी दिए ।
रेडियो नेपाल, एन्यूज टेलिभिजन र पब्लिक एफएममा कार्यरत सिंह प्रेस चौतारी नेपाल पर्सा शाखाका सचिव पनि हुन् । उनि विगत एक दशकभन्दा पनि बढी समयदेखि रेडियो, टेलिभिजनलगायतका सञ्चारमाध्यमबाट काम गर्दै आएका छन् ।
नेपाल पत्रकार महासंघ पर्साका अध्यक्ष तिवारीको अध्यक्ष्तामा भएको कार्यक्रममा जिल्ला प्रहरी कार्यालय पर्साका प्रमुख प्रहरी उपरीक्षक (एसपी) कोमल विक्रम शाह, नेपाल पत्रकार महासंघका पूर्व केन्द्रिय सदस्य महेश दास, नेपाल पत्रकार महासंघ पर्साका पूर्व अध्यक्ष शंकर खतिवडा, शत्रुघन नेपाल, प्रेस युनीयन पर्साका अध्यक्ष रामनारायण कुर्मी, प्रेस सेन्टर पर्साका अध्यक्ष दीपक गौतम, समाजवादी प्रेस संगठन पर्साका अध्यक्ष मनोज पटेल, नेपाल खेलकुद पत्रकार महासंघ पर्साका अध्यक्ष तिवारी यादव, नेपाल फोटो पत्रकार महासंघका केन्द्रिय सदस्य विजय चौहान, मधेश प्रदेश अध्यक्ष पञ्कज श्रेष्ठलगायतका उपस्थिति रहेको थियो ।
नेपाल पत्रकार महासंघ पर्सा शाखाका कार्यसमिति सदस्य सर्राफको यसै वर्ष हृदयघातका कारण निधन भएको थियो ।
