वीरगञ्ज,१६ चैत । पर्साको ठोरीमा फेरिपनि बाघको आतंक देखा परेको छ। एउटा घटना सेलाउन नआउदै फेरि गएराती पर्सा राष्ट्रिय निकुञ्जबाट आएको पाटे बाघले ठोरी ४ मानेचोकका स्थानीयबासी नबिन तामाङको गोठमा पसि बाख्राको खोर नै सखाप पारेको छ । बाघले ५ वटा माउ बाख्रा, २ वटा खसि गरि ७ वटा बाख्रा मारिदिएको कुसुम बाटिका मध्यवर्ती उपभोक्ता समीतीका अध्यक्ष बुद्ध पाख्रीनले रेडियो बिजयबस्तीलाई जानकारी दिनु भयो ।
स्थानीय समेत रहनु भएका कुसुम बाटिका मध्यवर्ती उपभोक्ता समीतीका अध्यक्ष पाख्रीनले घटना प्रति ध्यानाकर्षण भई यथाशीघ्र यो पाटेबाघलाई नियन्त्रणमा लिन सम्बन्धित निकाय तथा पर्सा राष्ट्रिय निकुञ्जलाई आग्रह गर्नु भएको छ । यदि यस बाघलाई समयमा नियन्त्रणमा नलिई ब्यवास्था गरेमा जनता आक्रोशित हुने र यस क्षेत्रमा घट्ने सबै किसिमको घटनाको जिम्मेवारी निकुञ्जले लिनु पर्ने बताउनु भयो । पटक-पटक बाघले स्थानीयले पालेका घरपालुवा जनावरलाई मार्दा पनि सम्बन्धि निकायले बाघलाई नियन्त्रणमा नलिई निकुञ्जमा नै छाडेको भन्दै ठोरीका स्थानीय आक्रोसित बनेका छन् ।
घट्ना थाहा पाए लगतै स्थानीयबासीले पर्सा राष्ट्रिय निकुञ्ज प्रशासनलाई खबर गरेका थिए । उक्त बाघलाई स्थानीय बासी,निकुञ्जका कर्मचारी र आर्मीको संयुक्त टोलीले पर्सा राष्ट्रिय निकुञ्ज तर्फ धपाउन सफल भएका छन् । घट्नामा के कति क्षेती भयो भन्ने बिस्तृत बिवरण भने आईसकेको छैन ।
गएको चैत ७ सात गते पनि पर्सा राष्ट्रिय निकुञ्ज बाट निस्कीएको पाटे बाघले ठोरीको घ्याङडाँडाका स्थानीय मिक्मर लामाको गोठमा पसि ६ वटा बाख्रा १ भैसिको बाडा मारेको थियोे ।
