वीरगंज १४ चैत । यातायात व्यवस्था कार्यालय सवारी चालक अनुमतिपत्र वीरगंजमा आउदो १९ गते देखि अनुमतिपत्र (लाईसेन्स) दिने प्रक्रिया निश्चित भए लगतै कार्यालय प्रमुख कमल गौतमले सेवाग्रहीहरुबाट रकम असुल्ने बिचौलिया परिचालन गरेको समाचार प्राप्त हुन आएको छ ।
वीरगंजमा अनुमतिपत्र (लाईसेन्स) रकममा विक्री हुने गरेको बदनामी कमाएका सवारी चालक अनुमतिपत्र कार्यालयले गत माघ महिनामा करोडौं करोड रकम असुल गरी फागुन महिनामा बन्द गरी यही आउदो १९ गते देखि लाईसेन्स विक्री गर्ने बिचौलियाहरु परिचालन गरेको स्रोतले जनाएको छ ।
प्रमुख गौतमको विश्वासपात्र मानिएका सह–लेखापाल मनोज निरौला र कार्यालय सहयोगी शम्भु गुरुङ्ग लगायतकालाई रकम असुल्ने बिचौलियाको रुपमा परिचालन गरेको स्रोतले जनाएको छ । वर्षौ वर्ष देखि शम्भु गुरुङ्ग करारका रुपमा कार्यरत्त कार्यालय सहयोगी भए पनि उनको म्याद जो सुकै कार्यालय प्रमुख आए पनि थप्ने गरेको बताईन्छ । गुरुङ्ग कार्यालय सहयोगी भए पनि उनी वीरगंजदेखि चितवनसम्म घडेरी र आलिशान महल जोडन सफल व्यक्तिको रुपमा परिचित रहेका छन् ।
गत माघ महिनामा फेल हुने सेवाग्रहीहरुलाई पास गराई करोडौ करोड दम्पच गरेका गौतमको कालाकर्तुतहरुलाई अख्तियार दुरुपयोग अनुसन्धान आयोगले ट्रायलमा राखिएका सिसिटिभी क्यामराको फुटेज चेक गरी अनुसन्धान गरेमा सहजै प्रमाण भेटन सकिने छ । ट्रायल सेन्टरमा ट्रायल भईरहेको कतिपय अवस्थामा सिसिटिभी क्यामरा बन्द गरी वा बिगारे जस्तो गरी गौतमका भ्रष्टाचारी दुतहरु विभिन्न बहाना बनाउने गरेको स्रोतको कथन रहेको छ ।
वीरगंजमा लाईसेन्स विक्री हुने गरेको सर्वत्र चर्चा हुन थाले पछि यस आसपास लगायत बारा, रौतहट, हेटौडा, सिन्धुपालचोक, चितवन लगायत भित्रि पहाडी भेगबाट सेवाग्रहीहरु आउने गरेको बताईन्छ । मोटरसाईकल, कार, जिप, हेभी लगायतका अनुमतिपत्रहरु कार्यालयले आन्तरिक रुपमा तोके बमोजिमको घुुसको रकम तिरेर सहजै तरिकाले सेवाग्रहीहरु पाउने भए पछि भिडभाड बाक्लो नै हुने गरेको पाईन्छ । प्रमुख गौतमले यस भन्दा अगाडि सोही कार्यालयमा भारतीय अनुमतिपत्रहरु नेपालीकरण गरेको आरोपमा अख्तियार दुरुपयोग अनुसन्धान आयोगबाट निलम्बनमा परी विभिन्न शक्ति केन्द्र धाई निलम्बन फुकुवा गराई पुनः भ्रष्टाचारको कार्यलाई तिब्रता दिएको स्रोतले जनाएको छ ।
भ्रष्टाचार गर्नमा सिपालु मानिएका गौतमले जिल्ला प्रशसान कार्यालय, जिल्ला ट्राफिक प्रहरी कार्यालय पर्सा, भौतिक पूर्वाधार विकास मन्त्रालय मधेश प्रदेश, यातायात व्यवस्था विभाग, भौतिक पूर्वाधार तथा यातायात मन्त्रालय र अख्तियार दुरुपयोग अनुसन्धान आयोग लगायतको नियमनकारी गर्ने निकायमा गौतमले गर्दै गरेका कालाकर्तुतहरुको भागवण्डा दिने गरेको सोही कार्यालयमा कार्यरत्त एक कर्मचारीले नाम नछाप्ने शर्तमा बताए ।
यस सन्दर्भमा प्रमुख गौतम संग पटक–पटक मोबाईल फोन सम्पर्क गरी प्रतिक्रिया लिन खोज्दा मोबाईलको स्विच अफ रहेको पाईयो ।
