वीरगञ्ज,६चैत । प्रहरीले वीरगञ्जबाट लागूऔषध खैरो हेरोइन (ब्राउन सुगर ) सहित ४ जनालाई पक्राउ गरेको छ । वीरगञ्जको दुई छुट्टा छुट्टै स्थानबाट प्रहरीले १ युवतीसहित ४ जनालाई पक्राउ गरेको हो ।
वीरगञ्ज महानगरपालिका वडा नम्बर १६ रजतजयन्ती चोकस्थित सडकमा प्रहरी चौर्की ईनर्वाबाट खटिएको प्रहरी टोलीले शंकास्पद अवस्थामा भारतबाट नेपालतर्फ आउँदै गरेका चितवनको भरतपुर महानगरपालिका– १७ निवासी २४ बर्षीय अमित गुरुङ र २४ बर्षीया सुनिता विकलाई १ ग्राम खैरो हेरोइनसहित पक्राउ गरेको पर्सा प्रहरीका प्रवक्ता प्रहरी नायब उपरीक्षक कुमारविक्रम थापाले जानकारी दिए ।
यस्तै वीरगञ्ज महानगरपालिका वडा नम्बर १५ स्थित सडकमा प्रहरीले बा.९५ प २३०३ नम्बरको स्कुटी रोकेर चेकजाँच गर्दा त्यसमा सवार दुई युवकपनि खैरो हेरोइनसहित पक्राउ परेको थापाले बताए ।पक्राउ पर्नेमा रौतहटको चन्द्रपुर नगरपालिका– ५ का २४ बर्षिय सेजल श्रेष्ठ र पर्साको जिराभवानी गाँउपालिका–२ का १९ बर्षिय विजय साह रहेका छन् । उनिहरुको साथबाटपनि १ ग्राम खैरो हेरोइन बरामद भएको प्रहरी नायब उपरीक्षक थापाले जानकारी दिए ।
खैरो हेरोइनसहित पक्राउ परेका चारै जना विरुद्द लागु औषधसम्बन्धी कसूरमा थप अनुसन्धान कार्य भइरहेको थापाले बताए ।
