वीरगञ्ज । वीरगञ्जस्थित नेशनल एकेडेमीमा आयोजित वाद-विवाद प्रतियोगिता सम्पन्न भएको छ । विद्यार्थी भित्र रहेको रचनात्मक कलाहरूलाई प्रस्फुटन गर्ने उद्देश्यका साथ क्याम्पस प्राङ्गणमा आयोजित “वैज्ञानिक शिक्षा भन्दा नैतिक शिक्षा बेस” विषयक वाद-विवाद प्रतियोगिता शुक्रवार सम्पन्न भएको हो ।
प्रतियोगितामा क्याम्पसमा अध्ययनरत ४० भन्दा बढी विद्यार्थीले सहभागिता जनाएका थिए । प्रत्येक शुक्रवार गरिने अतिरिक्त पाठ्यक्रम गतिविधिअन्तर्गत आयोजित प्रतियोगितामा कक्षा १२ मा अध्ययनरत छात्रा विनीता साह प्रथम भइन् । त्यस्तै क्याम्पसमा सञ्चालित बिबिएस पहिलो वर्षमा अध्ययनरत छात्रा अञ्जलि चौधरी दोस्रो र कक्षा १२ मा अध्ययनरत ज्यास्मिन खातुन तेस्रो भइन् ।
वाद-विवाद प्रतियोगिताको निर्णायक मण्डलमा नेशनल एकेडेमी क्याम्पसका नेपाली प्राध्यापक बलराम श्रेष्ठ, उज्ज्वल अर्याल तथा अङ्ग्रेजी विषयमा प्राध्यापक नीरज सिंह रहेका थिए ।
कार्यक्रममा ठाकुरराम बहुमुखी क्याम्पसका पूर्व क्याम्पस प्राध्यापक तथा नेशनल एकेडेमी क्याम्पसका संस्थापक प्राध्यापक इन्दु शेखर मिश्र, क्याम्पसका निर्देशक तथा एचआर दिलीप प्रजापति, डाइरेक्टर तथा फाइनान्स हेड गुड्डु रौनियार लगायतले विजय हुने विद्यार्थीलाई मेडल, ट्रफीलगायतले सम्मानित गरेका थिए । कार्यक्रम सञ्चालन कक्षा १२ मा अध्ययनरत नेहा कुशवाहाले गरेकी थिइन् ।
