वीरगञ्ज । वीरगञ्ज महानगरपालिकाले लामखुट्टे नियन्त्रणका लागि स्प्रे छर्ने कार्य सुरु गर्ने तयारी गरेको छ । गर्मी सुरु भएसँगै लामखुट्टे बढेको हुँदा महानगरपालिकाले यही फागुन २४ गते बिहीवारदेखि महानगरका सबै वडामा स्प्रे छर्न लागेको हो ।
लामखुट्टेको प्रकोप र त्यसबाट फैलिन सक्ने डेंगु, मलेरिया जस्ता प्राणघातक रोगको संक्रमण नियन्त्रणका लागि स्प्रे कार्यक्रम हुन लागेको सरफाई व्यवस्थापन शाखा प्रमुख सर्फुदिन मियाँले बताए । महानगर प्रमुख राजेशमान सिंहको निर्देशनअनुसार लामखुट्टेको लार्भा मार्नका लागि बिहानको समयमा ३ राउण्ड पम्प स्प्रे गर्ने तालिका रहेको उनले बताए ।
सरसफाई शाखा प्रमुख मियाँका अनुसार औषधी, पानी र मट्टितेलको मिसावट गरी बनाइएको स्प्रे यही फागुन २४ गते वीरगञ्ज महानगरका वडा नम्बर १, २, ३ र ४ मा छरिनेछ ।
२५ गते ५,६,७ र ८ मा, २६ गते ९,१०,११ र १२ मा, २७ गते १३,१४,१५ र १६ मा स्प्रे गर्ने तालिका रहेको छ । यस्तै २८ गते १७,१९,२५ र २६ मा, २९ गते १८,२०,२२ र २७ मा, ३० गते २१,२३,२४ र ३० मा र चैत १ गते २८,२९,३१ र ३२ मा स्प्रे गरिनेछ ।
चैत २ गतेदेखि पुनः दोस्रो राउण्डको स्प्रे सुरु गरिने पनि मियाँले जानकारी दिए ।
