वीरगञ्ज । एक हजार रुपैयाँ दरको नक्कली नोटसहित पर्सा प्रहरीले दुई जनालाई नियन्त्रणमा लिएको छ ।
नक्कली नोट प्रयोग गरेर किनमेल गरिरहेको आरोपमा पर्सा प्रहरीले वीरगञ्जबाट दुई युवकहरूलाई नियन्त्रणमा लिएको हो । प्रहरीले उनीहरूको साथबाट ३८ वटा एक हजार दरको गरी कूल ३८ हजार रुपैयाँको नक्कली नोट बरामद गरिएको समेत जनाएको छ ।
पर्सा प्रहरीका प्रवक्ता एवम् प्रहरी नायव उपरीक्षक (डिएसपी) कुमार विक्रम थापाका अनुसार गत शुक्रवार नक्कली नोट प्रयोग गरेर दुई जनाले वीरगञ्ज – ८ स्थित सिटी मार्केटमा कपडा खरिद गर्न खोजीरहेको भन्ने सूचनाको आधारमा प्रहरीले दुई जनालाई पक्राउ गरेको थियो ।
पक्राउ पर्नेमा पर्साको वीरगञ्ज महानगरपालिका – ३१ कोनिया निवासी २४ वर्षीय ऋषिलाल पटेल र बाराको कलैया उपमहानगरपालिका – ३ निवासी २५ वर्षीय उमेश कुमार रहेका छन् ।
ऋषिलाल र उमेशले गत कार्तिक २४ गते शुक्रवारका दिन साँझ ८ बजेको समयमा सिटी मार्केटस्थित एक पसलबाट नक्कली नोट प्रयोग गरेर कपडा खरिद गर्न खोजेको डिएसपी थापाले बताए । सोही क्रममा पसलेले नक्कली नोट पहिचान गरी प्रहरीलाई खबर गरेका थिए ।
नक्कली नोटको विषयमा खबर पाउन साथ घटनास्थलमा पुगेको प्रहरी टोलीले ऋषिलाल र उमेशलाई कानुनी रीत पुर्याई खानतलासी गर्दा उनीहरूको साथबाट एक हजार दरको ३८ थान गरी ३८ हजार रुपैयाँको नक्कली नोट बरामद भएको डिएसपी थापाले जानकारी दिए । ऋषिलाल र उमेश हाल प्रहरी नियन्त्रणमा छन् र उनीहरूविरुद्ध खोटा चलन सम्बन्धी कसुरमा थप अनुसन्धान कार्य भइरहेको थापाको भनाई छ ।
वीरगञ्जमा यसअघि पनि विभिन्न समयमा नक्कली नोटहरू बरामद भएका छन् ।
