काठमाडौं, २३ कार्तिक । नेपाल मेडिकल कलेजमा दिपावली, नेपाल सम्वत ११४४ तथा छठ पर्वको अवसरमा रंगोली प्रतियोगिता आयोजना गरिएको छ । कलेजको स्टुडेन्ट डेभलपमेन्ट कमिटीले आयोजना गरेको प्रतियोगितामा एमविविएस, विडिएस, विएस्सी नर्सिङ पहिलो वर्षमा अध्ययनरत विद्यार्थीदेखि इन्टर्नहरुले सहभागिता जनाए ।
१३ वटा समुहमा बनाइएका रंगोली मध्ये उत्कृष्ट ३ वटालाई पुरस्कृत समेत गरियो । प्रतियोगिताको प्रथम पुरस्कार डाक्टर सदिक्षा चौधरी, डिप्लभ थापा मगर र स्पाञ्जल थापाको समुहले हात पार्यो । प्रतियोगितामा ४ वटा समुहले दोश्रो पुरस्कार प्राप्त गर्दा तेश्रो पुरस्कार एमविविएस २४ औं व्याचका विद्यार्थीले प्राप्त गरेको प्रतियोगिताकी संयोजक डा. प्रशंसा सिटौलाले जानकारी दिइन् ।
नेपालीहरुको दोश्रो महान चाड दिपावलीको अवसर पारेर कलेजमा अध्ययनरत विद्यार्थीहरुलाई चाडपर्वको रौनक प्रदान गर्नका लागि प्रतियोगिता गरिएको कार्यक्रम संयोजक सिटौलाले बताइन् ।
प्रतियोगितामा विद्यार्थीहरुले बनाएको रंगोलीको मुल्यांकन कलेजका प्रबन्ध निर्देशक बसरुद्धिन अन्सारी, भाइस प्रिन्सिपल डा. सृष्टि श्रेष्ठ, प्रमुख प्रशासकीय अधिकृत ज्योति खड्का लगायतले गरेका थिए । विजयी समुहलाई कलेजका प्रबन्ध निर्देशक अन्सारी, प्रिन्सिपल प्रा.डा. क्षेत्रीले नगद पुरस्कार र प्रमाणपत्र वितरण गर्दै चाडपर्वहरुको शुभकामना दिएका थिए ।
