वीरगञ्ज । पर्सा प्रहरीले विशेष सूचनाको आधारमा बुधबार राति ०८:५५ बजेको समयमा बिल विजक भन्दा बढी हार्डवेयर , औषधी तथा खुद्रा सामानहरू बोकेको दुई वटा मालबाहक ट्रकहरुलाई नियन्त्रणमा लिएको छ ।
वीरगञ्जबाट झापातर्फ जाँदै गरेको ना. १ ख ३२०१ नम्बरको मालवाहक ट्रकलाई वीरगञ्ज महानगरपालिका वडा नं. १५ प्रतिमा चोक स्थित सडकखण्डमा रोकी चेकजाँच गर्ने क्रममा विल विजक भन्दा बढी मालबस्तुहरू लोड रहेको तथा सो विल बिजक संकास्पद देखिएको हुँदा अंदाजी मूल्य रू. ४४ लाख ४३ हजार ३ सय १७ बराबरको ट्रक भित्र लोड रहेको हार्डवेयर, औषधी तथा खुद्रा सामानहरू नियन्त्रणमा लिई थप अनुसन्धान तथा आवश्यक कारवाहीको लागि बिहीबार राजश्व अनुसन्धान कार्यालय पथलैया बारामा बुझाइएको छ ।
साथै सोही राति करिब १०:४५ बजेको समयमा बिल विजक भन्दा बढी औषधी तथा खुद्रा सामानहरू बोकेको ना. ४ ख ११२७ नम्बरको मालवाहक ट्रकलाई वीरगञ्ज बाट नुवाकोट तर्फ जाँदै गरेको अवस्था बाट वीरगञ्ज महानगरपालिका वडा नं. १४, गण्डक चोकस्थित सडक खण्डमा रोकी चेक जाँच गर्ने क्रममा विल विजक भन्दा बढी मालबस्तुहरू लोड रहेको तथा सो विल बिजक संकास्पद देखिएको हुँदा अंदाजी मूल्य रू. २० लाख ६५ हजार ९ सय ८० बराबरको ट्रक भित्र लोड रहेको औषधी तथा खुद्रा सामानहरू नियन्त्रणमा लिई थप अनुसन्धान तथा आवश्यक कारवाहीको लागि बिहीबार राजश्व अनुसन्धान कार्यालय पथलैया बारामा बुझाइएको जिल्ला प्रहरी कार्यालय पर्साका प्रवक्ता एवम् प्रहरी नायब उपरीक्षक कुमार विक्रम थापाले बताए ।
