वीरगञ्ज । संविधान दिवसका अवसरमा वीरगञ्जका १७ जना कैदी बन्दी रिहा हुने भएका छन् ।
१७ जनामध्ये तिन जना महिला र १४ जना पुरुष कैदी बन्दीले कैद माफी मिनाहा पाएको वीरगञ्जका कारागारका सूचना अधिकारी नवराज बर्तौलाले बताए । बर्तौलाका अनुसार २ जना ज्येष्ठ नागरिक, तीन जना महिला र नौ जना अन्य कैदी बन्दीहरू छुट्ने छन् ।
राष्ट्रपति रामचन्द्र पौडेलले संविधान दिवसका अवसरमा देशभरबाट ६ सय ७० जना कैदीको कैद कट्टा गरी सजाय माफी मिनाहा गरेको मध्ये वीरगञ्जका १७ जना कैदी बन्दी परेका छन् ।
मन्त्रिपरिषद्को सिफारिसका आधारमा राष्ट्रपति पौडेलले आजदेखि लागू हुने गरी ६ सय ७० जनाको माफी मिनाहा गरेको राष्ट्रपति कार्यालयले विज्ञप्तिमार्फत जनाएको छ ।
राष्ट्रपति कार्यालयकी प्रवक्ता शैलज रेग्मी भट्टराईले निकालेको विज्ञप्तिमा ६ सय ७० जना कैदीको भुक्तान हुन बाँकी सजाय माफी गर्ने मन्त्रिपरिषद्को सिफारिसबमोजिम असोज ३ गतेदेखि लागू हुने गरी संविधान दिवस २०८० को अवसरमा माफी मिनाहा भएको उल्लेख छ । सभार : ज्योति दैनिक
