वीरगञ्ज । पर्सा प्रशासन र प्रहरीले ज्यादति गरेको साहुकारहरुले आरोप लगाएका छन् । विहीबार नेपाल पत्रकार महासंघ पर्साको सभाहलमा पत्रकार समेलनमा अनुचित लेनदेन (मिटरब्याज) को निहुँमा स्थानीय प्रशासन र प्रहरीले ज्यादति गरेको आरोप लगाएका हो । साहुकारहरुको संगठन पिडित लेनदेन संघर्ष समिति पर्साका अध्यक्ष सुनिल पाण्डेले अदालतको आदेशलाइ समेत उल्लंघन गरेर प्रमुख जिल्ला अधिकारी र प्रहरी उपरीक्षकले साहुकारहरुलाई अभद्र व्यवहार गर्ने , प्रहरी थुनामा पठाउने, जबरजस्ति मिलापत्र गराउने , मुद्धा चलाउने गरिरहेकोे बताए ।
अनुचित लेनदेन सम्बन्धि कानुन बने यता जिल्लामा सिडिओ र एसपीले साहुकारहरुलाई प्रताडित गर्दै आइरहेको उनले बताए । पाण्डेले भने,‘ वास्तविक मिटरब्याजीलाई कारबाही हुनैपर्छ । तर लेनदेन सम्बन्धि परेका उजुरीका लागि सिडिओ अफिसमा बोलाएर साहुकारसंग दुुव्र्यवहार गर्ने , जबरजस्ति मिलापत्र गराउने , नमानेमा साहुकारलाई प्रहरी थुनामा पठाइदिने , सार्वजनिक मुद्धा चलाइदिने जस्ता विृकति बढेको छ ।’
अदालतमा विचाराधिन लेनदेन सम्बन्धि मुद्धामा पनि जिल्ला प्रशासन कार्यालय र जिल्ला प्रहरी कार्यालयले उजुरी लिएर साहुकारहरुलाई प्रताडित गरिरहेको उनले बताए । पाण्डेले भने,‘ यहाँको प्रशासन र प्रहरी अदालत भन्दापनि माथि देखिएको छ । यदि यस्तै हो भने सरकारले अदालत बन्द गरिदिए हुन्छ ।प्रशासन र प्रहरीको रवैयाले अहिले गाँउसमाजमा कसैलाइ विहेबारी वा आपत पर्दासमेत ऋण दिन नचाहने समस्या सृजना भएको उनले बताए ।
संघर्ष समितिका उपाध्यक्ष राजेश पटेलले स्थानीय प्रशासन र प्रहरीले अदालतको आदेशको समेत उल्लंघटन गर्दा कानूनी राज्यको उपहास भएको बताए ।अनुचित लेनदेन सम्बन्धि सरकारले बनाएको कानुनको आड पर्सामा सिडिओ र एसपीको आंतक नै बढेको आरोप उनले लगाए । उनले भने,‘ गाँउसमाजमा लेनदेन गर्ने सबैजना मिटरब्याजी नै हुदैनन् , छरछिमेकीलाई अप्ठ्यारो पर्दा सहयोगको भावले लेनदेन गर्नेपनि हुन्छन् , तर अहिले उनिहरुलाई कानुनको आडमा मिटरब्याजीकै आरोप लगाएर धाकधम्कि दिने , हातपात गर्ने र प्रहरी थुनामा पठाउने काम सिडिओ र एसपीबाट भइरहेको छ । यसले समाजिक सद्भाव नै बिथलिएको छ ।
पर्साका सहायक प्रमुख जिल्ला अधिकारी शीव प्रसाद लम्सालले अनुचित लेनदेन सम्बन्धि कानुन कार्यान्वयन गर्ने क्रममा जिल्ला प्रशासन कार्यालयले कसैसंगपनि अभद्र व्यवहार वा जोरजबरस्ति नगरेको बताए ।
लम्सालले भने,‘ अहिलेसम्म ५२४ वटा उजुरीमा छलफल हुदाँ १० भन्दा कम व्याक्तिलाई नै प्रहरी थुनामा पठाइएको छ , त्योपनि एक दुई दिनका लागि मात्र । मुद्धा दर्तापनि दुई जना विरुद्ध मात्र भएको छ ।जिल्ला प्रशासन कार्यालय पर्सामा मिटरब्याज सम्बन्धि १ हजार ३ सय २१ वटा उजुरी परेका छन् । तीमध्ये बुधबारसम्म ५२४ वटा उजुरीका विषयमा दुवै पक्षलाई राखेर छलफल गरिएकोमा २९३ वटा उजुरीमा मिलापत्र भएको पर्साका सहायक प्रमुख जिल्ला अधिकारी लम्सालले जानकारी दिए । यस्तै दुई वटा उजुरीमा भने मिलापत्र हुन नसकेकाले मुद्धा दर्ता गरिएकोपनि उनले बताए ।
