वीरगञ्ज । वीरगञ्जस्थित नारायणी अस्पतालको सरसफाइ सोमबारदेखि वीरगञ्ज महानगरपालिकाले गर्न सुरु गरेको छ । महानगरपालिका र अस्पताल प्रशासनबिच गरिएको सम्झौताअनुसार साउन १ गतेदेखि महानगरपालिकाले अस्पतालको सरसफाइको जिम्मा लिएको हो ।
पहिलो दिन सोमबार महानगरका मेयर राजेशमान सिंहले आफैँ सरसफाइ शाखाका कर्मचारीको टोलीका साथ अस्पतालमा पुगेर सरसफाइ गराएका छन् । त्यस क्रममा मेयर सिंहले सरसफाइको अनुगमन गर्नुका साथै अस्पताल परिसर सफा र स्वच्छ राख्न सेवाग्राहीहरूसँग आग्रह गरेका द । अस्पतालको सफाइ र व्यवस्थित पार्किङमा अटेर गर्नेलाई जरिवाना समेत गरिने मेयर सिंहले बताए ।
अस्पतालका मेडिकल सुपरिटेन्डेन्ट डाक्टर चित्तरञ्जन साहले अब अस्पतालको सरसफाइमा लापरबाही हुन नदिने बताए । अस्पतालको सेवा पनि गुणस्तरीय बनाउनका लागि आफूहरू लागि परेकाले यसमा पनि महानगरको साथ र सहयोग पाउने अपेक्षा रहेको उनले बताए ।
अस्पताल प्रशासन र महानगरपालिकाबिच भएको सम्झौताअनुसार साउन १ गतेदेखि एक वर्षका लागि नारायणी अस्पतालको शल्यक्रिया र वार्डभित्र बाहेक अस्पतालको सबै क्षेत्रमा महानगरपालिकाले सरसफाइ गर्नेछ । अस्पतालको शौचालय,बरन्डा, भर्याङ, प्रशासनिक भवनका साथै अस्पताल परिसरको सरसफाइ महानगरले गर्ने सम्झौतामा उल्लेख छ । शल्यक्रिया कक्ष र वार्डको सफाइ भने अस्पताल प्रशासन आफैले गर्ने मेसु साहले बताए ।
सम्झौताअनुसार अस्पतालमा सरसफाइ गरेबापत महानगरपालिकाले अस्पतालसँग कुनै शुल्क लिने छैन । यस्तै सरसफाइका लागि वीरगञ्ज महानगरपालिकाले अस्पतालमा नौ जना कर्मचारी खटाएको छ ।
अस्पताल परिसरमा जथाभाबी फोहर गर्ने व्यक्तिविरुद्ध महानगरपालिकाको फोहर मैला व्यवस्थापन ऐन २०७५ बमोजिम दण्ड जरिवाना तथा कारबाही समेत गर्ने सम्झौतामा उल्लेख रहेको महानगरपालिकाको सरसफाइ महाशाखाका प्रमुख सरफुदिन मियाँले जानकारी दिए ।
