वीरगञ्ज,२३ पुष । जिल्ला प्रहरी कार्यालय पर्साका थुनुवालाई न्यानो कम्बल वितरण गरिएको छ । केही दिन यता बढ्दै गएको शितलहर तथा चिसोलाई मध्यनजर गर्दै जिल्ला प्रहरी कार्यालय पर्साका थुनुवाको लागि ग्रिनसिटी सामुदायिक सेवा केन्द्रमार्फत २० थान कम्बल उपलब्ध गराइएको हो ।
सामुदायिक प्रहरी साझेदारी कार्यक्रमअन्र्तगत केन्द्रका अध्यक्ष जयप्रकाश खेतानको पहलमा समाजसेवी मुरलीधर रुंगटाले जिल्ला प्रहरी कार्यालय पर्साका प्रमुख प्रहरी उपरीक्षक कोमल बिक्रम शाहलाई हस्तान्तरण गरेका हुन् ।
समाजसेवी मुरलीधर रुंगटा, व्यवसायी शिव रुंगटा, आकाश रुंगटा लगायतले प्रहरी उपरीक्षक शाहसँगै प्रवक्ता एवम् प्रहरी नायब उपरीक्षक दिपक गिरीलाई २० थान कम्बल हस्तान्तरण गरेका हुन् ।
जिल्ला प्रहरी कार्यालयमा २० थानसँगै विभिन्न स्थानमा पुगेर १ सय थान कम्बल वितरण गरिएको केन्द्रका अध्यक्ष खेतानले जानकारी दिए । खेतानका अनुसार बढ्दै गएको चिसोबाट प्रभावित भएका अशक्त, अति विपन्न एवम् सडक आश्रीतहरुलाई १ सय थान कम्बल वितरण गरिएको हो ।
