वीरगन्ज, १९ पुष । नेपाल पत्रकार महासंघ पर्सा शाखाले हरेक बर्ष वितरण गरिने गोपाल गिरि स्मृति क्रियाशील पत्रकारिता पुरस्कार वीरगन्जका पत्रकार महेश दासलाई प्रदान गरिने भएको छ ।
एभिन्युज मधेस प्रदेशका प्रमुख पत्रकार दासलाई गोपाल गिरी स्मृति क्रियाशील पत्रकारिता पुरस्कार प्रदान गर्ने नेपाल पत्रकार महासंघ पर्साको मंगलवार बसेको बैठकले निर्णय गरेको हो । वीरगन्जलाई कार्यक्षेत्र बनाएर पत्रकारिता गर्दै आउनुभएका दासलाई यो पुरस्कार दिने निर्णय गरिएको नेपाल पत्रकार महासंघ पर्साका सचिव भूषण यादवले जानकारी दिनुभयो ।
नेपाल पत्रकार महासंघ पर्सा शाखाका पूर्व सभापति समेत रहेका गोपाल गिरीको स्मृतिमा स्थापना गरिएको पुरस्कार बर्सेनि माघ १ गते वितरण गर्दै आएको छ । यसअघि यो पुरस्कार पर्साका पत्रकारहरु गया यादव, कन्हैयालाल केशरी, शत्रुघन नेपाल, केसी लामिछाने, महेशचन्द्र गौतम, श्याम बन्जारा, ओमप्रकाश खनाल, ध्रुव साह, बिजय भण्डारी, प्रताप श्रेष्ठ लगायतलाई प्रदान गरिसकिएको छ ।
नेपाल पत्रकार महासंघ पर्साका अध्यक्ष अनुप तिवारीको अध्यक्षतामा बसेको बैठकमा कार्यसमितिका पदाधिकारी र सदस्यहरुको उपस्थिति रहेकोे थियो ।
