जोतिलाल प्रजापति ,३ कार्तिक
बाराको जीतपुर सिमरा उपमहानगरपालिका– ९ छातापिपरा स्थित त्रिवेणी स्पेनिङ उद्योगमा मजदुर र प्रहरीबीच झडप भएको छ । झडपलाई नियन्त्रणमा लिन प्रहरीले १ राउण्ड गोली र ३४ राउण्ड अश्रु ग्याँस प्रहार गरेको छ ।
झडपमा परी १० जना नेपाल प्रहरीका जवान घाईते भएका छन् ।
९ जनाको अवस्था सामान्य छ भने एक जनाको अवस्था मध्यम छ । घाईतेहरुको टाउको, छाती, अनुहार हात, खुट्टामा चोट लागेको छ । घाईते हुनेहरुमा प्रहरी नायब उपरीक्षक युबराज तिमिल्सिना, प्रहरी निरीक्षक राज किशोर साह तेली, प्रहरी नायब निरीक्षक राजन थापा, प्रहरी हवल्दार श्रीराम पटेल घाईते छन् । प्रहरी सशस्त्र प्रहरी हवल्दार दिपक गुरुङ, प्रहरी जवानहरु राजेश पूनः मगर, राजेश पुन मगर, सदाम हुसेन, रुदल कुमार यादव, रुबोध कुमार यादव, सुरेन्द्र महतो घाईते छन् । उनीहरुलाई अल्पाईन अस्पतालमा सामान्य उपचारपछि थप उपचारका लागि गण्डक अस्पताल वीरगञ्जमा रिफर गरिएको प्रहरीले जनाएको छ ।
भिडलाई तितर बितर गर्न प्रहरी तर्फबाट ३४ राउण्ड अश्रु ग्यास सेल र सर्ट गन बाट १ राउण्ड फायर गरिएको जिल्ला प्रहरी कार्यालय बाराका प्रमुख प्रहरी उपरीक्षक होबिन्द्र बोगटीले जानकारी दिए ।
प्रहरीको सिल ढाल १३ थान फुटेको, बेदको लाठी ९ थान भाँचीएको प्रहरीले जनाएको छ । प्रहरीले त्रिवेणी स्पिनिङका सि.ई.ओ., जि.एम., प्रशासन अधिकृत लगायत ५ जना लाई प्रशासन कक्षबाट उद्दार गरेर सिमरा ल्याईएको छ । झडपमा संलग्न रहेको आरोपमा ७ जना पुरुष मजदुरलाई प्रहरीले नियन्त्रणमा लिएको छ । प्रहरीले मजदुर पक्षमा के कति क्षति भयो त्यसको विवरण खुलाएको छैन ।
दशैं तिहारको बोनस नदिएको विषयलाई लिएर कामदार कर्मचारी र व्यवस्थापन पक्षबीच दुरी बढेको थियो ।
प्रहरीले दिएको जानकारी अनुसार कात्तिक २ गते साँझ ५ः२० बजे कम्पनीमा कार्यरत २÷३ सय कामदार तथा कर्मचारीहरु कम्पनीले दशैं तिहारको बोनस नदिएको भन्दै आन्दोलित भएका थिए ।
उनीहरुले प्रबन्ध निर्देशकको कार्यकक्षमा तालाबन्दी गरी बसेका थिए । ईलाका प्रहरी कार्र्यालय सिमरा बाट प्रहरी नायब उपरीक्षक सहितको सुरक्षाकर्मीको टोली गएर सम्झाई बुझाई गरेका थिए । साँझ ७ः १० बजे प्रबन्धन निर्देशकको कोठाको ताल्चा खुलाई प्रहरी र कामदारको लिडर बसी छलफल समेत भएको थियो । राति १०ः२० बजे वर्ता बिना निष्कर्ष टुंगिएको थियो । कामदारहरु बाहिर निस्केर शान्तपूर्वक धर्नामा बसेका थिए ।
