बाराको परवानीपुर गाउँपालिका वडा नं। ५ स्थित श्री राम जानकी मन्दिर मा भइरहेको पर्खाल निर्माण कार्यलाई लिएर विवाद उत्पन्न भएको छ ।
स्थानीय युवा दिपु देव दास ले सामाजिक सञ्जालमार्फत मन्दिरको पर्खाल निर्माण बिना नापजाँच तथा गाउँभेला नगरी मनपरी ढंगले भइरहेको भन्दै खबरदारी गरेका हुन् ।
उनले भोजपुरी भाषामा सार्वजनिक गरेको सन्देशमा “मन्दिरमा बिना कुनै नापी तथा गाउँभेला गरी उपभोक्ता समिति नबनाई मनपरी रूपमा पर्खाल घेराबन्दी भइरहेको” आरोप लगाएका छन्। साथै उनले उक्त काम तत्काल रोक्न र गाउँभेला गरेर कानुनी तथा पारदर्शी प्रक्रियामार्फत उपभोक्ता समिति गठन गरी मात्रै निर्माण अघि बढाउन माग गरेका छन् ।
दासले आफूले बुझेको विषयलाई भिडियोमार्फत सार्वजनिक गरेको उल्लेख गर्दै विकास निर्माणका काम पारदर्शी र जनसहभागितामूलक हुनुपर्ने बताएका छन्।
स्थानीयस्तरमा धार्मिक स्थलको निर्माण कार्यमा प्रक्रिया मिचिएको भन्दै उठेको आवाजपछि विषय अहिले गाउँमा चर्चाको केन्द्र बनेको छ। केही स्थानीयले पनि निर्माण कार्यबारे स्पष्ट जानकारी सार्वजनिक गर्न तथा सम्बन्धित पक्षले जनतालाई विश्वासमा लिनुपर्ने माग गरेका छन् ।
