बारा,। बाराको निजगढ–९ बुद्ध चोकस्थित गुरुङ होटलमा शुक्रबार राति एक युवती मृत फेला परेकी छन् । निजगढ–१२ घर भएकी २५ वर्षीया सीता थिङ्ग गुरुङ होटलको कोठाभित्रै शुक्रबार राति मृत फेला परेकी हुन् ।
उक्त घटनामा प्रहरीले निजगढ–९ की १८ वर्षीया अनु सुनार, जीतपुरसिमरा–१६ का ३५ वर्षीय महेश ओझा र ३६ वर्षीय सुनिल बम्जनलाई अनुसन्धानका लागि पक्राउ गरेको छ ।
प्रहरीका अनुसार, सीता आफ्ना अन्य तीन जना साथी अनु, महेश र सुनिलसंगै शुक्रबार राति होटलमा आएकी थिईन् । राति ११ बजे अचेत अवस्थामा भेटिएकी उनलाई तत्कालै निजगढस्थित सामुदायिक अस्पताल लगिएपनि चिकित्सकले मृत घोषणा गरेका थिए ।
उनको घाँटीमा दाग देखिएकाले मृत्यु शंकास्पद रहेको बाराका प्रहरी प्रवक्ता एवम् प्रहरी नायब उपरीक्षक बिजयराज पण्डितले जानकारी दिएका छन् ।
प्रहरीका अनुसार सीता महेशसँग होटलमा आएकी थिईन् । सीतासँग निजगढकी अर्की अनु र सुनिल टांगियाबस्तीका अर्का एक पुरुष साथी पनि साथमा थिए ।
राति करिब साढे सात बजे उनीहरु होटलमा प्रवेश गरेको सीसीटिभी क्यामेराको फुटेजमा देखिएको छ । उनीहरुले होटलमा बसेर मदिरा पिएको र खाना खाएपछि छुट्टाछुट्टै कोठामा गएका थिए । महेश र सीता एउटा कोठामा र अर्का दुई साथी अर्को कोठामा थिए ।
राति करिब ११ बजे महेशले अर्को कोठामा रहेकी सीताकी साथीलाई बोलाउँछन् । सीताले बाथरुममा झुण्डिने प्रयास गरेको र आफू एम्बुलेन्स बोलाउन जाने भन्दै महेश होटलबाट बाहिर निस्किएर मोटरसाइकल लिएर फरार हुन्छन् । महेशले होटल सञ्चालकलाई समेत साथी बिरामी भएकाले एम्बुलेन्स लिन जान लागेको बताउँछन् ।
महेशसँगै आएका अर्का युवक सुनिल सीतालाई अचेत देखेपछि फरार हुन्छन् । घटनास्थलमा रहेकी सीताकी साथी अनुले होटल सञ्चालकलाई खबर गर्छिन् र होटल सञ्चालकले तत्काल प्रहरीलाई बोलाउँछन् ।
खबर पाएलगत्तै ईलाका प्रहरी कार्यालय निजगढका प्रहरी निरीक्षक जिवन लामिछानेको नेतृत्वमा प्रहरी टोली घटनास्थलमा पुग्छ । जिल्ला प्रहरी कार्यालय बाराका प्रहरी उपरीक्षक नरेन्द्र कुँवर समेत रातिनै कलैयाबाट निजगढ पुग्छन् ।
घटनास्थलमा रहेकी सीताकी साथीलाई नियन्त्रणमा लिएर प्रहरीले अनुसन्धान सुरु गर्छ । सीताकी साथी अनुले प्रहरीलाई घटनाको यथार्थ बताउँछिन् । प्रहरीले तत्कालै महेशको खोजी सुरु गर्छ । घटनास्थलबाट फरार भएका महेशलाई खोज्दै प्रहरी उनको गाउँ टांगियाबस्ती पुग्छ । त्यही क्रममा जंगलको बीचमा महेशसँगै होटलमा आएका अर्का युवक सुनिल पनि पक्राउ पर्छन् ।
महेश भने टांगियाबस्तीस्थित घरमा भेटिदैनन् । प्रहरीले निजगढ नगरपालिका ७ माझी टोलस्थित उनको आफन्तको घरबाट महेशलाई शनिबार बिहान ४ बजे पक्राउ गर्छ । प्रहरीले हाल तीनै जनालाई नियन्त्रणमा राखेको छ । मृतक सीताको शव शल्य परीक्षणका लागि पठाएको छ । बाराका प्रहरी प्रवक्ता पण्डितले शल्यपरीक्षण रिपोर्टले मृत्युको कारण खुल्ने बताए ।
