वीरगन्ज — पर्साको सखुवाप्रसौनी गाउँपालिका–३ कौवाबन गाउँस्थित मुसहर बस्ती तथा वीरगन्ज महानगरपालिका–१९ केहुनियाको दलित बस्तीका बालबालिकालाई शैक्षिक सामग्रीसहित खानेकुरा वितरण गरिएको छ।
फिस फर दलित फाउण्डेशनले सञ्चालन गर्दै आएको निःशुल्क ट्युसन कक्षामा अध्ययनरत दलित समुदायका ३ सय २० जना बालबालिकालाई कापी, कलम, झोला, चाउचाउ र बिस्कुट वितरण गरिएको हो।
फाउण्डेशनका अध्यक्ष मनोज रामका अनुसार बौधिसत्व बिहार, बुढानिलकण्ठ काठमाडौंको सहयोगमा सामग्री वितरण गरिएको हो। उनले दलित बालबालिकाको पठनपाठनमा सुधार ल्याउने उद्देश्यले आगामी दिनमा पनि विभिन्न शैक्षिक तथा सचेतनामूलक कार्यक्रम सञ्चालन गरिने जानकारी दिए।
कार्यक्रममा फाउण्डेशनका सचिव दिपेन्द्र राम, सदस्य विनोद रामलगायतको उपस्थिति रहेको थियो।
आफ्नो प्रतिक्रिया दिनुहोस
