पर्सा — पर्सा–१ का सांसद हरि पन्तले आफ्नो निर्वाचन क्षेत्रसँग सम्बन्धित विभिन्न गम्भीर विषयहरू प्रधानमन्त्रीसमक्ष उठाएका छन्।
सिंहदरबारस्थित प्रधानमन्त्री तथा मन्त्रिपरिषद् कार्यालयमा मधेस प्रदेशका सांसदहरूसँग भएको भेटका क्रममा सांसद पन्तले सिर्सिया नदी प्रदूषण, मल अभाव, क्यासिनो अनियमितता तथा वीरगञ्ज महानगरको कथित अवैध असुलीका विषयमा ध्यानाकर्षण गराएका हुन्।
सांसद पन्तले सिर्सिया नदीको बढ्दो प्रदूषण नियन्त्रण गर्न अधिकारसम्पन्न समिति गठन गरी निश्चित समयसीमाभित्र समस्या समाधान गर्नुपर्ने बताएका छन्। साथै उनले किसानलाई आवश्यक समयमा पर्याप्त मल उपलब्ध गराउन सरकार जिम्मेवार बन्नुपर्नेमा जोड दिए।
त्यसैगरी उनले वीरगञ्जका क्यासिनोहरूले नेपाली नागरिकलाई अवैध रूपमा प्रवेश गराई आर्थिक शोषण गरिरहेको आरोप लगाए। यस्तो गतिविधि भइरहँदा पनि प्रहरी र प्रशासन मौन बसेको भन्दै उनले असन्तुष्टि व्यक्त गरे।
वीरगञ्ज महानगरपालिकाले विभिन्न स्थानमा ढाट राखेर अवैध रूपमा शुल्क असुलिरहेको दाबी गर्दै उनले यस विषयमा प्रमुख जिल्ला अधिकारी र प्रहरी प्रमुखबीच जिम्मेवारी पन्छाउने प्रवृत्ति देखिएको गुनासो पनि प्रधानमन्त्रीसमक्ष राखेका थिए।
जवाफमा प्रधानमन्त्रीले सम्बन्धित निकायलाई तत्काल निर्देशन दिने बताएका छन्। उनले जनप्रतिनिधिले उठाएका जायज विषयहरू बेवास्ता गर्न नमिल्ने स्पष्ट पार्दै सुरक्षा निकाय र प्रशासनलाई जिम्मेवार बन्न आग्रह गरे।
भेटमा श्रममन्त्री दीपक साह, प्रधानमन्त्रीका राजनीतिक सल्लाहकार असिम शाह तथा मधेस प्रदेशका अन्य सांसदहरूको उपस्थिति रहेको थियो।
