पर्सा । पर्सा निर्वाचन क्षेत्र नम्बर २ मा नेपाली काँग्रेसका प्रतिनिधिसभा सदस्य उम्मेदवार अजय चौरसिया ले मतदातालाई अफवाह र भ्रामक प्रचारको पछि नलाग्न आग्रह गर्नुभएको छ। मतदाता भेटघाट तथा जनसम्पर्क अभियानका क्रममा विभिन्न स्थानमा आयोजित कार्यक्रममा बोल्दै उहाँले नेपाली काँग्रेस सधैं जनताको हितमा काम गर्दै आएको जिम्मेवार र लोकतान्त्रिक पार्टी भएको बताउनुभयो।
उम्मेदवार चौरसियाले नेपालको लोकतान्त्रिक आन्दोलनदेखि संविधान निर्माणसम्मका ऐतिहासिक उपलब्धिहरू काँग्रेसकै नेतृत्वमा हासिल भएको उल्लेख गर्नुभयो। “देशले प्राप्त गरेका प्रमुख राजनीतिक परिवर्तन र उपलब्धिहरूमा नेपाली काँग्रेसको भूमिका निर्णायक रहँदै आएको छ,” उहाँले भन्नुभयो, “त्यसैले जनताले अफवाहभन्दा पनि तथ्य र कामका आधारमा निर्णय गर्नुपर्छ।”
उहाँले काँग्रेसकै पहलमा जनताको पक्षमा धेरै महत्वपूर्ण कानुनहरू निर्माण गरिएको दाबी गर्दै आमाको नामबाट नागरिकता वितरणसम्बन्धी कानुन त्यसको महत्वपूर्ण उदाहरण भएको उल्लेख गर्नुभयो। यस्तो कानुनले नागरिकताको समस्यामा परेका हजारौं नागरिकलाई राहत पुगेको भन्दै काँग्रेसले सधैं नागरिकको अधिकार र सम्मानलाई प्राथमिकतामा राख्दै आएको स्पष्ट पार्नुभयो।
चौरसियाका अनुसार पर्सा निर्वाचन क्षेत्र नम्बर २ मा हालसम्म भएका धेरै विकास निर्माणका कार्यहरू पनि नेपाली काँग्रेसकै नेतृत्वमा सम्पन्न भएका छन्। सडक, खानेपानी, शिक्षा र अन्य भौतिक पूर्वाधार विकासमा काँग्रेसको योगदान देखिने गरी रहेको उहाँको भनाइ छ।
आगामी योजनाबारे बोल्दै उहाँले सडक सञ्जाललाई थप विस्तार गर्दै गाउँ–गाउँसम्म उद्योग सञ्चालनको वातावरण बनाउने लक्ष्य रहेको बताउनुभयो। यसले स्थानीय स्तरमै रोजगारी सिर्जना भई युवालाई स्वदेशमै अवसर प्रदान गर्ने विश्वास पनि उहाँले व्यक्त गर्नुभयो। “विकासका सपना साकार पार्न जनताको साथ, सहयोग र विश्वास अत्यन्त आवश्यक छ,” चौरसियाले जोड दिनुभयो।
जनताले गरेका अपेक्षा र विश्वास आफू निर्वाचित भएपछि पूरा गर्ने प्रतिबद्धता जनाउँदै उहाँले नेपाली काँग्रेस सधैं सेवा, अधिकार र विकासका लागि तत्पर रहँदै आएको र आगामी दिनमा पनि सोही मार्गमा निरन्तर अघि बढ्ने स्पष्ट पार्नुभयो।
